Pa duna inicio na proyecto nobo
ORANJESTAD (AAN) Den conferencia di prensa, señor Clifford Rosa, a sigui informa tocante e proyectonan di e Fundacion pa e aña aki.
Clifford Rosa lo representa Fundacion Rancho, otro siman, dia 28 di Januari, na Hulanda, p’asina duna inicio na un proyecto nobo cu tin di haber cu, con pa facilita fondonan pa nos comunidad, di manera cu e por sigui eherce un parti di su herencia cultural intangibel.
“Esaki sigur ta algo nobo cu lo comparti cu otro diferente instancia na Hulanda, y Stichting Rancho cu lo representa e parti di Aruba y Islanan di Caribe tambe.
Esey ta un bon inicio y p’esey nos kier duna di conoce cu e eventonan ta bay haya un bida nobo, pa nos por pensa con nos ta bay activa y eherce e parti di conserva herencia aki na Aruba”, Clifford Rosa a comenta.
El a gradici e Fondo di Cultura su participacion, y tambe e colaboracion cu Fundacion Rancho tin cu diferente instancia, manera Embahadanan Hulandes, Gobierno y tur instancia cu nan ta bay ta acercando, p’asina duna inicio na un proyecto nobo di Fundacion Rancho.
“Cu esaki mi ta yegando na otro eventonan cu ta bay tin dia 16 di Februari, cu ta conmemoracion di segundo guera mundial, cu nos ta bay pone atencion riba dje; 18 di Maart cu nos no kier lague pasa aworaki, nos kier cuminza anuncia akinan, pasobra tur esakinan lo bin den un bachi nobo cual mester wordo crea door di creativonan cu nos ta bay ta dunando e oportunidadnan pa nan crea, eigenlijk, imagennan nobo p’asina aki nos por presenta tambe na nos comunidad”, Clifford Rosa a duna di conoce.
Clifford Rosa a sigui splica cu 18 di Maart lo bira un evento hopi mas grandi, cu locual e fundacion ta custumbra di haci.
“Pasobra hopi biaha nos ta haci’e pa nos duna e coredornan di boto e momento pa nan practica nan herencia, y esaki ta algo maraviyoso.
Pero den esaki, e aña aki nos kier duna e carera nomber, anto un di e nombernan cu sigur ta importante pa nos, ta e persona Lee de Windt, cu no ta desconoci, mirando cu e ta un persona cu a duna masha hopi mes di su parti, hopi aña di experiencia como Capitan di boto miniatura, y cu a hiba esaki na Bonaire y otro islanan.
“E ta un persona cu nos ta bay dun’e su honor, y e atencion necesario, pa mustra e importancia di traspasa su conocemento pa un otro generacion, p’asina nos por sigui garantiza cu nos lo sigui mantene e boto miniatura”, Clifford Rosa a señala.
Rosa a agrega cu banda di esey tambe lo reactiva e Asociacion di Boto Miniatura p’asina ey tuma over pa mantene y crea e enseñanza rond di e tradicion cultural aki.
