Informe di Oficina Central di Estadistica
ORANJESTAD (AAN): Riba Diabierna, Oficina Central di Estadistica (CBS) na Aruba a emiti nan informacion mensual di CPI.
Esaki ta e Indice di Prijs di Consumo pa luna di December 2025. E CPI pa luna di December 2025 ta 109.47, loke ta representa un subida di 0.4% compara cu e indice di November 2025 (109.03).
E cambio di e CPI pa e ultimo 12 lunanan (December 2024 te cu December 2025) ta 0.4%, un subida di 0.1 punto di porcentahe (ppt) compara cu e periodo corespondiente di aña pasa (0.3%). E promedio anual (ultimo 24 luna) di e tasa di inflacion pa e periodonan di December 2022 te cu December 2023 y December 2024 te cu December 2025 ta 0.1%, un caida di 1.6 ppt compara cu e 1.7% registra den e periodonan di December 2021 te cu December 2022 y December 2023 te cu December 2024.
Durante e luna aki, 8 di e diesdos sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di “Recreaccion y cultura” (1.6%), “Restante bienes y servicio” (1.0%) y “Restaurant y hotel” (1.8%), causando un efecto di respectivamente, 0.13, 0.12 y 0.09 ppt. E subidanan den e sectornan restante a contribui cu un efecto di 0.15 ppt riba e CPI di December 2025.
E subidanan aki a wordo contraresta parcialmente door di principalmente caida den e indicenan di e sectornan di “Comunicacion” (-0.4%) y “Transporte” (-0.2%) cu a contribui cu un efecto di respectivamente, -0.04 y -0.03 ppt riba e CPI di December 2025. E caida den e sector restante a contribui cu un efecto di -0.02 ppt riba e CPI di December 2025.
E subida den e sector di “Recreaccion y cultura” a wordo causa principalmente door di un subida di 11.7% den e categoria “Vacacion”, causando un efecto di 0.21 ppt. E subida den e sector di “Restante bienes y servicio” a wordo causa principalmente door di un subida den e categoria “Otro articulonan personal” (6.8%), causando un efecto di 0.09 ppt. E subida den e sector di “Restaurant y hotel” a wordo causa principalmente door di un subida di 52.2% den e categoria “Servicio di alohamento”, causando un efecto di 0.08 ppt. E caida den e sector di “Comunicacion” a wordo causa door di un caida di 6.5% den e categoria “Ekipo di telefon y fax”, causando un efecto di -0.04 ppt. E caida den e sector di “Transporte” a wordo causa door di un caida den e categoria “Compra di vehiculo” (-3.7%), causando un efecto di -0.17 ppt.
Canasta di consumo E canasta di consumo di e CPI ta consisti di 408 bienes y servicionan. Compara cu November 2025, 47.5% di e bienes y servicionan aki a conoce un aumento di prijs causando un efecto di 1.12 ppt, mientras cu 36.8% ta mustra un caida di prijs, cu a contribui cu un efecto di -0.71 ppt y pa e restante 15.7% no tabata tin cambio den prijs. Compara cu November 2025, prijsnan di bienes (-0.1%) a conoce un caida y a causa un efecto di -0.07 ppt, mientras cu prijsnan di servicionan (1.1%) a registra un subida y a contribui cu un efecto di 0.48 ppt riba e CPI di December 2025.
Core inflation E CPIC (core inflation) - CPI excluyendo e efecto di energia y cuminda - a registra na December 2025 un subida di 1.0%. E indice di energia - cu ta consisti di e productonan: electricidad, awa, gasolin y diesel - a registra un caida di 3.8%. E indice di cuminda a registra un subida di 0.3%.
