Minister Ursell Arends a splica:
ORANJESTAD (AAN) – Minister Ursell Arends, den entrevista cu DIARIO tocante e situacion causa pa algun septic truck cu, na lugar d hiba e awa di pos na RWZI tabata bash’e den mondi, causando molester den diferente bario, a splica cu e companianan aki ta haya boet.
Y mientras tanto su ministerio ta finalizando un maneho cu dentro di poco lo wordo lanza den transporte, unda cu e companianan aki tambe lo mester tin un vergunning apart. Esaki lo hacie mas facil pa tur e departamentonan cu mester haci control, y lo duna nan tambe un standard di operacion. Esaki ta finalizando y dentro di poco lo publica informacion tambe, e dignatario a menciona.
E mandatario a añadi cu mirando cu a haci uso di algun di trucknan aki pa colecta awa di laundry, gobierno ta trahando riba un reglamentacion pa esaki, pasobra tin agricultornan cu ta haci uso di e awa aki pero e proceso con esaki ta wordo colecta y entrega cerca nan tambe gobierno ta trahando riba dje, p’asina aki fiha un standard con esaki por tuma lugar.
Minister Arends a informa tambe cu pa fin di e luna di Juni aki, e lo ricibi e ultimo advies pa loke ta trata e Comision cu a traha riba e “vet oil & grease” y ta bay cuminza tambe cu e parti di implementacion cu lo crea regla, no solamente pa e companianan aki, pero tambe pa restaurant y hotelnan ora nan ta los den e sistema di riool, ki consecuencia esaki tin.
