Misterio di presupuesto 2025 cu a desaparece ta bay rementa den Reino
*Desesperacion a conduci na aumento di pensioen prome cu formacion
*Mike no tabata tin placa reserva pa paga Reparatie toeslag 700 Florin
ORANJESTAD (AAN) — Ta a base di e exigencianan di Ley di Contabilidad, cu ta e base di bon gobernacion financiero di Aruba, ta contene e realidad cu Gobierno mester gasta placa a base di un presupuesto, cu ta wordo aproba dor di Parlamento, cu tin e deber pa vigila uzo di placa di e pagador di belasting mientras cu Reino tin e deber hancra den Statuut, pa asegura gobernacion na bienestar di e ciudadano Hulandes, cu e Arubiano ta.
Pa por a informa Pueblo di Aruba debidamente, kico ta pasando cu formacion di un Gobierno nobo y pakico te awe no tin resultado pero mas bien un situacion basta caotico, DIARIO a bay directamente na e Leynan cu ta regla gobernacion di e pais y tambe na e exigencianan di supervision Hulandes, cu ta garantisa cu e Arubiano ainda por come despues di e gobernacionnan di Mike Eman.
Pakico awe Aruba ainda no tin un Gobierno? Pa comprende esaki no mester bay busca un contesta den e sala di Parlamento, caminda segun Ley decisionnan ta wordo tuma pa mara Pueblo na un gobernacion.
Den e caso aki, mester bay en busca di e ansia politico di Mike Eman pa dirigi un Gobierno, loke ta depende di voto di Pueblo, cu atrobe durante e campaña di Mike Eman, a wordo conkista cu e promesa di mas placa pa e grupo di ciudadanonan di edad avanza cu ta depende di pensioen di behez.
E prome di un aumento di pensioen di behez cu 700 Florin na momento cu gobierno Mike Eman bira realidad, a conduci manera por a spera na votonan pa Mike Eman, cu claramente no por a conduci e estudionan necesario pa a haci e promesa cu el a haci.
Durante ultimo añanan Gobierno Evelyn Wever-Croes, cabalmente a cumpli cu su deber pa for di December entrega e cifranan pa goberna e pais durante e aña cu ta sigui
Pa comprende loke a pasa cu Aruba den e ultimo lunanan aki, mester bolbe na e realidad cu Gobierno a base di Ley, ta gasta placa a base di e presupuesto, cu ta e cifranan cu ta mustra cuanto placa lo tin den caha di Gobierno pa goberna e pais.
E cifranan di 2025, e Presupuesto di 2025, a wordo entrega for di December 2024 na Reino Hulandes y tabata contene sumanan cu tabata indica cu Gobierno Wever-Croes a laga placa atras pa garantisa un bon maneho financiero di Aruba y a honra e exigencianan di Reino.
Eleccion a trece cambio di Gobierno. Eleccion a trece Dianan di Fiesta y den tur e desaroyonan aki no a tende mucho di e cifranan cu cual mester goberna Aruba na 2025 y cu tabata suficiente placa.
Mas bien a surgi confusion riba kico a pasa cu e cifranan y hasta por corda cu e actual Presidente di Parlamento tabata tin un confrintacion cu Ministro Maduro di Asuntonan Financiero.
Finalmente e Presupuesto a mira luz y mester a wordo trata den Parlamento, caminda Mike Eman cu hunto cu Gerlien Croes mester forma un Gobierno, a anuncia cu e ta cambia e cifranan aki pa inclui un aumento di pensioen di behez, pero cu no ta honra e cifra di 700 Florin cu el a bisa cu lo bira aumento di e pensioen di behez cu tabata e motibo cu cual el a gana eleccion.
Mike Eman y AVP ta mustra con awor nan ta bolter Presupuesto pa duna e e grupo di grandinan un aumento cu no ta nada compara cu e 700 florin priminti.
E aumento aki mester ta den e cifranan oficial di Aruba, pues e Presupuesto cu a desaparece y no por a wordo trata anteriormente, pero awor mester wordo cambia manera Mike Eman ta exigi pa haci.
Unda Ley cu ta proteha Pueblo contra wega politico, Ley di Contabilidad ta keda, ta bini dilanti den e forma cu awor ta bay cambia e sumanan acorda y cu Hulanda ta exigi pa subi mesa y wordo aproba, pa asina Mike por cumpli cu un promesa cu atrobe e no por cumpli.
Mientrastanto e Hulanda cu tabata alaba bon trabou di Aruba, ya a cuminsa splica cu e cifranan mester subi mesa pa asina evita y duna prueba cu ta tene na acuerdonan cu Reino, si no kier resultadonan na interes di e Pueblo di Aruba.
Esaki ta nifica cu prome cu Mike Eman a forma gobernacion, prome cu el a bira Ministro Presidente, ya por papia di un situacion serio riba tereno financiero a base di un presupuesto cu practicamente a desaparece y no a wordo trata manera Ley ta exigi.
DIARIO cu Ley den man ta sigui e desaroyonan sumamente serio cu a haci pa prome cu Mike Eman a sinta como Prome Ministro ya el a decreta den Parlamento cambio den e cifranan di Aruba pa motibo di un promesa di eleccion cu e mes a bisa cu e no por honra!
E presupuesto cu awor ta den Parlamento ta duna prueba, cu Mike Eman a haci un promesa cu e no por cumpli pasobra pa e por a cumpli, e pago di 700 Florin completo mester ta parti di e Presupuesto cu a wordo entrega dor di Gobierno Evelyn Wever-Croes y misteriosamente a keda den aire di e cambio di Parlamento.
