Parlamentario Otmar Oduber, fraccion PPA:
*Por ehempel, na KPA no tin Psicologo ni tin Hurista
ORANJESTAD (AAN) – Parlamentario Otmar Oduber, lider di fraccion di PPA, den conferencia di prensa, den cuadro di e reunion publico cu tabatin cu e Comision Fiho di Husticia, Korpschef Arnhem, KPA y SPA dos siman pasa, (tocante e caso di tiramento) di cual no por papia di loke a sosode y cu a wordo presenta den e Comision Fiho, a cuestiona e actitud di “mi no sa” “nos no sa” pasobra semper Parlamento a wordo trata asina.
Oduber a subraya cu nunca a mira Parlamento como Instituto cu di berdad por haci un diferencia.
“Y mi a compromete cu tanto SPA como Alto Mando Policial, e Parlamento aki cu fraccion di PPA, lo mira cambionan drastico den e forma di opera den nos Parlamento, y nos a logr’e tambe. Pesey mi kier gradici den e caso aki, e di dos parti di e reunion permanente aki cu tabata tin dos siman pasa cu Cuerpo Policial y SPA, a produci e documento cu nos tin riba mesa na e momentonan aki, cu nos no a ricibi for di gobierno.
Di tur e preguntanan cu nos a haci no a wordo produci anteriormente, ni pa e organizacion di Cuerpo Policial y e ta desenmascara hopi cos, sin punta dede den direccion di ni un hende, pero ta desenmascara un cantidad di accion cu mester tuma lugar, si nos kier pa nos Cuerpo Policial di berdad funciona manera cu nan merece y cu nan mester funciona y pueblo ta expect tambe di KPA pa nan funciona”, Otmar Oduber a señala.
El a reitera cu e ta contento cu a base di esaki a logra den e reunion publico siman pasa, despues di hopi tempo, cu cuater fraccion den Parlamento, na un forma unanime, a sostene e mocion di e fraccion di PPA. “Unda nos ta atende na un forma serio, cu atencion, tur informacion cu a bin dilanti den e reunion cu tabata tin cu SPA y cu Alto Mando Policial, den cual nos a haya un mocion, cu practicamente ta pone tambe tur fraccion, incluyendo esnan cu ta forma gobierno, y esnan cu ta den gobierno na e momentonan aki, cu ta bisa cu den e tratamento di e presupuesto aki nos a pidi pa accionnan wordo tuma pa loke ta trata e seriedad di cual nos mester tuma e mancamento cu tin den nos Cuerpo Policial”, Otmar Oduber, lider di PPA, a vocifera.
El a splica cu ora di papia di mancamento, ta cu simplemente no tin presencia, por ehemplo, di psicologo den KPA. “Ta suppose di tin psicologo in house, pero no tin! Bo ta atende cu un aparato y personanan cu tur dia ta pone nan bida na peligro, tur dia nan ta expone nan mes, nan ta haya den situacionnan social dificil, personal-emocional, imagina boso cu no tin un persona cu por atende cu nan pa añanan caba! No tin un hurista den KPA, di cuater vacatura cu tin pa hurista den Cuerpo Policial” Parlamentario Otmar Oduber a señala.
