Prome sesion di “Real Estate den Bario” pa 2026 ta diaranson awo 25 di maart na MFA Paradera

ORANJESTAD (AAN):  - ID Realty Group ta cuminsa oficialmente su agenda pa aña 2026 cu e prome sesion di su programa comunitario “Real Estate den Bario”,

cu lo tuma lugar dia 25 di maart, di 7:00 di anochi te 9:00 di anochi, na MFA Paradera. E sesion aki ta marca e inicio di un nobo serie di encuentro informativo dirigi pa duna orientacion practico y confiabel riba asuntonan importante relaciona cu real estate.

Durante e encuentro, e enfoke principal lo ta riba Ley di LTU cu ta implica e consecuencianan ora ta huur propiedad cu persona cu no tin su documento di residencia of trabou na Aruba, na ordo. Tambe lo papia di e proceso di compra y benta di un propiedad, splicando e pasonan esencial cu tanto cumprado como bendedo mester compronde pa tuma decisionnan informa y evita malcomprondemento den e proceso.

Segun ID Realty Group, e iniciativa Real Estate den Bario ta sigui crece den popularidad, ya cu e programa ta trece informacion importante mas cerca di comunidad y crea un espacio caminda residente por haci pregunta y ricibi splicacion directo di profesionalnan di e sector. E organizacion ta considera e prome sesion di 2026 como un paso importante pa continua fortalece conocemento financiero y legal den comunidad.

ID Realty Group ta invita tur ciudadano cu tin interes den compra, benta of inversion den propiedad pa participa den e sesion aki, cu ta completamente gratis y habri pa publico general.