ORANJESTAD (AAN): Diasabra 21 di maart mainta, Aruba One Happy Island Lions Club (OHIL) a participa activamente den un actividad di limpiesa y restauracion na Aruba Peace Labyrinth,situa patras di Kapel di Alto Vista.
Ya Prome cu 7or di mainta miembronan di e club tawata na e sitio cla pa cuminsa cu e trabounan na e laberinto. E iniciativa tabata parti di e programa nacional Aruba Doet.
E Aruba Peace Labyrinth, cu pa mas di 21 aña ta sirbi como un luga sagrado pa oracion, reflexion y trankilidad, ta wordo bishita diariamente pa habitantenan y bishitantenan cu ta busca paz y claridad. Desde 2019, e sitio aki a wordo restaura y manteni cu amor pa medio di diferente esfuerso voluntario.
Durante e actividad, miembronan di OHIL a contribui cu diferente trabou esencial y necesario di restoracion y beyesa. Tur participante di OHIL a expresa nan alegria y orgullo di por a sirbi den un proyecto cu tin tanto balor spiritual y comunitario.
Presidente di OHIL, señora Alliyuri Arends a mustra su gratitud sincero na tur boluntario cu a tuma parti, destacando e importancia di servicio comunitario y colaboracion pa preserva luganan significativo di Aruba.
E actividad aki no solamente a contribui na conservacion di un espacio especial, sino tambe a reafirma e compromiso como un club di servicio boluntario den comunidad.
