Prome Ministro yen orguyo a observa Hofi Pal’i Siya Cora di SPO Santa Cruz

ORANJESTAD (AAN): Recientemente Prome Minister mr. Mike Eman a haci un bishita na SPO na Santa Cruz den

cuadro di e plan nacional di reforestacion y e maneho pa siguridad alimenticio. SPO Santa Cruz pa algun tempo caba tin un hofi yama "Hofi Pal’i Siya Cora " den cual e studiantenan ta planta un variedad di mata cu ta produci fruta y berdura y ta yuda inculca agricultura cerca e alumnonan.

   Prome Minister Eman cu orguyo a wak con e hobennan di SPO Santa Cruz, bao guia di nan docentenan, ta participa na e causa grandi aki. Segun Eman, e plan nacional di reforestacion ta rekeri un gran cantidad di mata pa por yega e meta di planta cien mil mata den e siguiente cuater añanan. Ademas di e matanan cu mester pa planta, ta necesario tambe e experticio di esnan cu ta profundisa nan mes den plantamento pa por mantene e ciclo activo.

  Segun Eman, "SPO Santa Cruz tin un hoya di demostracion di con esaki ta worde haci y con e conocemento di con pa haci esaki den un forma cu e hobennan ta bira entusiasma y forma den e tema aki, y canando cu e hoofd di scol, awe ta hayando un rondleiding na SPO Santa Cruz". Den e hofi, por wak plantacion di yuca, melon, berehein y otro tipo di berdura cu tambe e hobennan ta planta.

   Plantamento di mata no solamente ta yuda cu e embeyecimento di Aruba sino ta contribui cu siguridad alimenticio cu ta un di e obhetivonan di Nacionnan Uni, pa percura pa nos propio alimento localmente y reduci e dependencia di importacion for di otro pais. E ta importante pa traspasa no solamente conocemento di un generacion pa otro, sino tambe e amor pa mata y locual naturalesa ta produci.

E plan nacional di reforestacion no ta solamente enfoca riba mas mata pero hunto cu colega minister Geoffrey Wever, ta encurasha e sector di agricultura mas ainda pa nos por cultiva localmente. Tipo di proyectonan manera Hofi Pal’i Siya Cora, ta yuda garantisa e exito di e plan di reforestacion pero sigur tambe pa garantisa produccion local di nos propio alimento.