Prome Ministro ta corda Missnan cu nan ta Embahadora di Aruba y tambe role-model pa hopi hoben

ORANJESTAD (AAN): Diabierna anochi na Enchanted Garden di House of Mosaic, e organizacion di Star Promotion a presenta Thessaly Zimmerman como Miss Universe Aruba 2021.

   A toca honor na Prome Ministro demisionario, Evelyn Wever-Croes pa instala e reina nobo, door di pone e sjerp rond di su curpa, y despues a corona e beyeza local.

   Prome Ministro Wever-Croes a indica cu tabata un honor pa no djis na nomber di Gobierno, pero tambe como hende muher.  Pasobra loke e organizacion di Star Promotion, y loke tur e diferente Missnan ta haci, ta mustra cu pa hende muher nada ta imposible.

   “Nos como hende muher, nos mes ta inspira nos mes, y nos ta permiti nada ni ningun hende limita nos den nos soñonan, y esey ta e motibo principal pakico mi ta aki awe, y mi ta gradici Star Promotion,” Premier Wever-Croes a bisa.  El a pidi publico pa duna Star Promotion un aplauso y publico a haci esey mesora cu algun grito di apoyo.

   E ta gradici Star Promotion pa e bunita trabao cu nan ta haci cu e damanan, y e inspiracion pa tur mucha muher cu tambe por aspira pa algo asina.

   Un conseho cu el a duna, ta pa no lubida nunca cu unda cu bo bay, cu bo ta un Embahadora di Aruba.  Nan ta mirabo como ‘Aruba’, pues corda cu unda cu bo ta, como embahadora di Aruba, hiba e nomber di nos pais hopi na halto.  Y corda cu eyfo tin hende cu ta buscando un persona como role-model, y bo no sa ki dia abo ta e role-model cu a pasa nan dilanti y a keda inspira nan.  Pesey semper purba inspira esun banda di bo.

   Con ta logre?  No djis door di keda inverti y traha riba bo beyeza publico, pero tambe e beyeza paden!  Si e beyeza mental tey, e ora nada por bay robez.

   Prome Ministro Wever-Croes a gradici e reina saliente, Helen Hernandez kende a representa Aruba na Hollywood (Florida) na Miss Universe.  “Hopi bunita Helen, masha masha danki, y e ta un sentimento hopi special ora cu bo mira Aruba wordo representa den exterior.  Masha masha danki Helen, y mi ta desea na Thessaly tambe hopi exito tambe den representacion di Aruba.