ORANJESTAD (AAN): Den entrevista online cu DIARIO, Dr. Jose Sprok, un arubiano cu a gradua varios aña pasa como Ciruhano Cardiovascular y a cosecha un carera exitoso como medico na Costa Rica
a duna su punto di bista relaciona cu e formacion di medicina na e pais centroamericano mirando cu ta varios e docternan arubiano cu a studia na Costa Rica y cu a keda lucha pa nan por traha na Aruba.
Dr. Sprok, cu entrante diamars ta bira Decano di Medicina na Universidad de Ciencias Medicas (UCIMED) a enfatisa cu e ta kere den e calidad di un universidad manera esaki y no pasobra el a wordo nombra awor, semper el a recomenda UCIMED den tur tempo.
Docternan cu a gradua na e universidad aki (priva) of Universidad de Costa Rica (cu ta e universidad publico mas renombra) por traha na Aruba y mas awor cu e aprobacion di AruBIG.
Semper tabata tin e discusion si e docternan cu a studia den e region ta califica of no pa por traha na Aruba y cu esey a bin e tema di AruBIG, cu aworaki a trece cu ne un cambio den ley pa e profesionalnan den medicina, dentista entre otro, cu a studia den e region, por wordo aplica pa traha na Aruba pa medio di un proceso di registracion.
Sprok a bisa, por ehempel, cu e docternan cu ta gradua na Hulanda ta gradua como BasisArts y esey ta hopi mas abao cu e docternan cu ta gradua na Costa Rica cu ta Medico General.
A indica cu e diferencia ta cu si un docter gradua na Costa Rica, e ta haci e incorporacion na Colegio de Medicos y inmediatamente por habri un consultorio y cuminsa duna consulta riba su mes.
Un 'BasisArts' gradua di Hulanda, no mag di haci esey. Un Medico General ta un tiki mas abao cu e Medico Familiar (HuisArts) ya cu medicina familiar ta un specialidad riba su mes.
Sprok a finalisa bisando cu e caminda ta habri caba y si e docternan cu a gradua na Aruba of cualkier otro pais den e region, si nan bay Costa Rica y haci Medicina Familiar, un bes cu nan logra e diploma ayanan, automaticamente por traha na Aruba. "Esey ta un gran logro, despues di hopi aña di lucha".
Awor mester wak con esaki ta bay sigui y si como medico general, por traha na Aruba sin ningun problema e añanan cu ta bin, Dr. Jose Mario Sprok a declara.
