Ademas di duna e origen di inflacion...
ORANJESTAD (AAN): Siman pasa Dialuna a tuma luga den Parlamento di Aruba e reunion cu a worde yama pa Parlamentarionan di oposicion. Un cu a yama e reunion aki riba e topico Costo di Bida, ta Parlamentario Mike Eman kende durante e reunion no tabata presente mustrando asina e falta di interes cu e tin riba e topico importante aki den pueblo.
Den su disertacion, Prome Minister Evelyn Wever-Croes y demas minister di Gabinete Wever-Croes a enfatisa e origen di inflacion riba nos pais. Algo cu oposicion a lubida completamente pa asina culpa Gabinete Wever-Croes di e inflacion, cu riba su mes, ta worde causa door di e inflacion mundial. Mundo henter a pasa den un crisis mundial di inflacion. Ta conoci cu Aruba ta importa practicamente tur cos, pues tambe inflacion. E pandemia mundial Covid-19, e guera di Ukraina, e aumento di prijsnan internacional di fleta y e crisis mundial di inflacion cu a sigui, tur ta factornan internacional cu a causa aumento di costo di bida mundialmente, na Aruba tambe.
E crisis mundial di inflacion a causa un crisis di inflacion aki na Aruba tambe. Mientras cu henter mundo ta buscando nan mesun maneranan pa maneha inflacion, localmente a inflacion a worde frena na diferente forma. Aki ta sigui algun di e pasonan cu Gobierno di Aruba a tuma pa frena inflacion y trece alivio pa nos comunidad: (1) A aumenta minimumloon 3 biaha. (2) A aumenta reparatie toeslag 2 biaha. (3) A aumenta pensioen di biehes 3 biaha. (4) A baha prijs di awa y coriente. (5) Ora e tarifa di awa y coriente mester a subi, a absorba e aumento pa un tempo. (6) No obstante prijs di crudo halto, ta cuminsa baha prijs di coriente. (7) A absorba e aumento di gasolin pa a un tempo. (8) A scoge pa aumento di BBO (inflacion di 1.4 %) en bes di BTW (inflacion di 5 pa 9 %) pa evita mas inflacion.
Tambe: (9) A baha inkomstenbelasting y loonbelasting 3 biaha. (10) A hisa e suma liber di impuesto 2 biaha y asina 36.161 hende no ta paga inkomstenbelasting ni loonbelasting mas. (11) A baha prima di AZV pa pensionado. (12) A baha grondbelasting riba casnan cu no ta di balor halto (y a aumenta e belasting riba casnan di balor halto). (13) A elimina e belasting riba herencia, successiebelasting. (14) A baha tarifa di winstbelasting riba ganashi di negoshinan di 25% pa 20%. (15) A baha desempleo y na aña 2022, 2400 mama y tata di famia a haya trabao. (16) Bek desde December 2020 pa awor.
“Gabinete Wever-Croes, despues di a hereda tur reto cu e gobierno di Mike Eman a laga atras, retonan financiero y economico cu a contribui na e inflacion cu awe Aruba ta bibando, hunto cu e factor pandemia y guera na Ukraina, Gabinete Wever-Croes a mustra curashi, a lora manga y a traha den tur reto y awe nos ta mira un Aruba cu ta recuperando”, Prome Minister Evelyn Wever-Croes a expresa.
