ORANJESTAD (AAN): Debi na informacion cu tabata drenta for di Venezuela y tambe datonan cu facilmente tabata drenta aki na Aruba mes,
autoridadnan specializa den investigacion di Traficacion Humano a drenta den accion y a ehecuta detencion.
Pesey mes, Diasabra den oranan di mainta, e seccion di oficialnan hudicial di Unit Mensensmokkel Mensenhandel (UMM) a haci dos detencion relaciona cu un caso di traficacion di hende.
Ta asina cu dos homber a wordo deteni. Ta trata di e homber A. Laveist di 45 aña naci na Aruba, y e homber R. Stamper di 34 aña naci na Aruba.
E oficialnan di Recherche di UMM a indica cu no ta descarta cu lo tin mas detencion.
E investigacion ta bay ta centralizando riba e sospecho cu un muher Leidy Yohana Salazar de Moreno di 40 aña procedente di Venezuela, a paga nan balente placa pa yude yega na forma clandestino na Aruba. Pero te dia di awe ningun hende a mira Leidy Yohana, como cu ta asumi cu e lo a supuestamente hoga ora di landa ultimo kilometer pa yega Aruba.
