Prome Ministro a reuni cu Unoca enfocando riba futuro di arte y cultura

ORANJESTAD (AAN): Siman a habri y Prome Ministro den oranan di mainta a ricibi na oficina directora di UNOCA,

señora Raquel Lampe, acompaña pa miembronan di directiva, pa un combersacion tocante e organizacion, su futuro y e rol importante cu e ta cumpli den sector cultural di Aruba.

   Durante e encuentro a trata diferente punto importante, entre otro e progreso cu Unoca a logra pa pone su cuentanan anual na dia, despues di un atraso cu tabata remonta for di 2021. Ta satisfactorio pa mira cu awe e organizacion ta up-to-date y cu tin entusiasmo pa sigui innova y crea oportunidadnan nobo den mundo di arte y cultura.

   Como Minister encarga cu Cultura, a felicita Unoca cu su 40 aniversario, y tambe Scol di Arte cu su 15 aniversario. Dos momento importante cu ta brinda oportunidad pa aprecia e trabao haci y, na mes momento, mira dilanti.

   Ta encurasha Unoca pa sigui apoya e diferente NGO-nan cu ta acerca nan cu proyectonan cultural, y pa sigui explora oportunidadnan nobo pa Scol di Arte y pa desaroyo di arte y cultura na Aruba. Nos cultura ta sigui desaroya ora organizacionnan, artista y comunidad haya espacio y oportunidad pa sigui crea.