Minister Geoffrey Wever:
ORANJESTAD (AAN): E proyecto pa restaura y duna un destino nobo na e edificio historico “John G. Eman” den Caya G.F. Betico Croes ta sigui avansa. Diamars ultimo, Minister di Finansa, Asunto Economico y Sector Primario, Geoffrey Wever, a reuni cu Stichting Monumentenfonds Aruba (SMFA) pa ricibi un update riba e progreso di e proyecto y coordina e siguiente pasonan pa cuminsa cu e trabounan fisico.
Presente na e reunion tabata Minister Geoffrey Wever, projectleider di Stichting Monumentenfonds sra. Jenilee Schotborg, program manager sra. Anne Witsenburg y directora di Monumentenfonds sra. Petra Davis.
E siguiente momento importante ta programa pa 2 di october 2026, ora e aanbesteding pa e promer fase di e proyecto lo tuma lugar. E fase aki ta encera e trabounan di desmantelamento, caminda tur parti no-monumental di e edificio lo wordo kita pa prepara e structura historico pa su restauracion. Ta proyecta pa e trabounan di desmantelamento ta cuminsa mitar di october.
Pa marca oficialmente e inicio di e fase aki, medio october ta planifica un momento simbolico cu sloophamer. Esaki lo marca e transicion di añanan di preparacion, estudio, negociacion y coordinacion pa e fase di ehecucion di e proyecto.
E proyecto John G. Eman tin un trayectoria di diferente paso importante. Riba iniciativa di Minister Geoffrey Wever, Stichting Monumentenfonds Aruba a investiga e posibilidad pa restaura y reuza e antiguo edificio di Aruba Bank y ubica Centraal Bureau voor de Statistiek (CBS) y Sociaal Economische Raad (SER) aden. E estudio a confirma cu e edificio por combina oficina pa ambos instancia cu vivienda y un espacio comercial/horeca.
Na october 2024, Conseho di Ministers a aproba e acuerdonan di huur pa CBS y SER den e edificio. Na 4 di december 2024, Minister Wever a firma un Memorandum of Understanding cu Aruba Bank N.V., Stichting Monumentenfonds Aruba y Restauratiefonds Nederland, marcando un paso concreto pa haci e compra, financiamento, restauracion y reuzo di e edificio posibel.
Na december 2025 un otro momento importante a wordo logra cu e entrega oficial di e edificio na Stichting Monumentenfonds Aruba. Awor, den 2026, e proyecto ta move pa e siguiente fase, cual ta preparacion directo pa inicio di e trabounan fisico.
Paralelamente, ta trahando riba e ultimo fase di diseño pa e futuro oficinanan di CBS y SER. E plannan pa e espacio di horeca y apartamento tambe ta den fase final di deliberacion y elaboracion.
E concepto di e edificio John G. Eman ta refleha e modelo cu Minister Wever a bin ta impulsa pa revitalisacion di Oranjestad: combina oficina, vivienda y actividad comercial/horeca den un solo edificio, pa crea mas presencia y movemento den centro durante diferente momento di dia. E concepto aki tabata parti di e vision for di inicio di e proyecto.
“Cada fase cu nos completa ta trece nos mas cerca di e meta. Nos a cuminsa cu un vision, despues a sigui cu estudio, acuerdonan, financiamento y traspaso di e edificio. Awor nos ta preparando pa e trabou fisico cuminsa. Asina nos ta move revitalisacion di Oranjestad dilanti, proyecto pa proyecto, cu paso concreto y resultado cu comunidad por mira,” Minister Geoffrey Wever a indica.
Pa mantene comunidad informa y haci e progreso visibel, lo tin momentonan di prensa na e logronan principal. cuminsamento y finalisacion di e desmantelamento, inicio di e restauracion y finalmente entrega di e proyecto.
E restauracion di edificio John G. Eman ta forma parti di e vision mas amplio di Minister Wever pa revitalisa y sigui desaroya centro di Oranjestad, preservando patrimonio historico y na mes momento dunando edificionan un funcion nobo cu ta contribui na actividad economico y social den centro di ciudad.
