ORANJESTAD (AAN): Dialuna atardi durante e conferencia di prensa di Gobierno pa anuncia flexibilizacion di diferente medida debi cu casonan activo di Covid-19 ta bahando
y tambe debi cu cantidad di pashentnan na Hospital a bira menos, dado momento a mustra Premier Evelyn Wever-Croes cu Diahuebs siman pasa Partido AVP tabatin un actividad na Pos Chikito, y aki e lider di AVP, Mike Eman a insinua cu ta Prome Ministro a manda Polis pa para e evento.
Den su contesta, Premier Wever-Croes a bisa cu prome cu e papia riba Mike Eman, el a bay prome riba loke el a observa di e candidatanan femenino Dr. Selene Kock y Gerlien Croes di Partido AVP, pasobra e ta tipifica e mentalidad di mentira y lanza acusacionnan sin base, mescos cu Mike Eman.
Wever-Croes a menciona cu Dr. Selene Kock ta un persona cu e no tabata conoce personalmente, y el a haci su entrada den politica e anochi ey na un forma hopi ekiboca, lanzando mentira. Cu Kock no ta e mihor orador publico cu tin, esey ningun hende no mester tume na malo y no tin di reclame riba esey tampoco. Pero cu e ta sali y tira mentira, esey sigur tur hende tin derecho pa reclam’e riba dje.
Dr. Kock a bisa cu ta Prome Ministro Wever-Croes lo a yama Hulanda dia cu el a lanza su mes den politica pa asina denunci’e di un forma of otro cu Hulanda.
“Mi ta kere cu esaki no solamente ta carece di seriedad, e ta mustra cu e ta un persona cu su nivel di inteligencia no ta yega asina leu pa interpreta hechos, pero e ta un mentiroso,” Wever-Croes a bisa.
“Ami ta un hende serio, ora cu ami yama Hulanda ta pa cos serio mi ta yama, y no tin ningun hende na Hulanda cu ta sinta warda ki dia Selene Kock ta subi lista politico, y pa ami mester bay yama pa bisa cu el a subi lista politico. Kiermeen e ta un acusacion totalmente sin base,” Wever-Croes a bisa. El a agrega cu el a lanza un mentira tambe den direccion di Ministro Dangui Oduber, pero esey ta e titular di Salubridad Publico mes lo bay contesta esey.
“Mi no ta aprecia cu un candidata cu ta nobo ta lanza su mes y ta tira mentira y calumnia den mi direccion. Mi no conoce Dr. Kock, pero mi a tende hopi di dje cu e ta un bon Docter di Pulmon. E mes a contact mi aña pasa durante Covid-19 varios biaha pa duna elogio pa e maneho, e tabatin inputs tambe, y mi a tene cuenta cu e inputnan. Despues mi a haya varios elogio di su parti.”
Wever-Croes a bisa cu ora el a bira Ministro di Infrastructura, cu Dr. Selene Kock a contact’e pa pidi pa yude haya un tereno. Premier Wever-Croes a conteste cu e como Ministro no ta duna tereno. Esey ta unico contactonan cu e tin cune.
“Pesey ta strañami masha hopi mes ora mi ta tend’e na tono masha emocional ta ‘claim’ cu mi a yama Hulanda pe,” Wever-Croes a bisa.
GERLIEN TAMBE:
Premier Wever-Croes a nota cu otro candidata, Gerlien Croes tambe a sostene e mentira di Dr. Kock, y a sigui fomenta esaki poco mas, y hasta bisa cu Wever-Croes ta den politica pa silencia hende.
“Nos no ta aki pa silencia ningun hende, y mi ta lamenta cu un politico prometedor manera Gerlien Croes kende ta mustra di kier hiba un politica diferente, tambe ta recuri na e tipo di mentiranan aki, siendo cu e sa mihor. Bo por puntra y bo ta haya sa. Ademas kende ta bay hinca den su cabez cu mi ta bay yama Hulanda pasobra un hende a subi lista politico, mi kiermeen ban serio si!”
Segun Premier Wever-Croes, el a gara Gerlien Croes ta gaña durante un debate di politiconan femenino, unda a papia di e 5 miyon corta for di AZV. Wever-Croes a splica cu nan ta na mesa aworaki den un Comision Nacional pa bin cu otro alternativa envez di e 5 miyon, y Gerlien Croes a bin bisa “cu no ta berdad cu ta Hulanda a impone pa corta 5 miyon di gasto di cuido”.
Aki Wever-Croes mester a pare y indike cu Gerlien ta gañando eynan, pasobra tur documento ta mustra cu ta Hulanda a impone e condicion aki.
MIKE Y SU MENTIRA:
Awor tin otro mentira di Mike Eman cu ta Wever-Croes a yama Polis pa para su evento. “Mi kiermeen mi tin mihor cos pa haci cu mi tempo, nos tin un Ministro di Husticia, un Hefe di Polis y Cuerpo Policial totalmente independiente y tin reglanan. Y e actividad cu Eman a organiza a sali totalmente for di control, y e no mester bay culpa ami e ora, e mes tin di carga su responsabilidad. Nos cada uno ta lidernan politico y mester carga nos responsabilidad. Si nos ta yama un actividad cu nos mes no por controla, anto e ora ta nos a faya.”
Wever-Croes a bisa cu e Diahuebs ey ta Mike Eman a faya, pasobra e no por a controla su actividad. Aworaki Aruba tin un ‘gebiedsverbod’, y esey kiermeen cu despues di 7:30 pm bo no por ta riba lugarnan publico mas.
“Mi a caba di duna un ehemplo, MEP tabatin un sticker-actie na Santa Cruz y pa 7:25 pm, tur hende a haya ordo pa bay y pa 7:30 pm e lugar tabata bashi. Esey ta liderazgo,” Wever-Croes a indica.
“Ami no ta keda eynan warda Polis bin y bisa cu ta Mike Eman a manda Polis. Mi ta kere cu Mike Eman mester: (1) Stop di play victima. Para den bo zapato manera un hende homber y carga bo responsabilidad. (2) Stop di gaña. (3) Stop di pone candidatonan femenino gaña pa bo.”
Wever-Croes a finaliza ta haci suplica na tur candidatonan di partidonan Politico, specialmente Dr. Selene Kock y Gerlien Croes. “No laga Mike Eman pone presion riba bo pa gaña pe, para den bo zapato manera hende muhernan firme cu boso ta, como profesionalnan cu boso ta, boso a cuminza fout pero bo por coregi’e na caminda si bo kier confianza di pueblo.”
