Prome Ministro a bay saluda tur mama na SABA na Palisiaweg

ORANJESTAD (AAN): Riba Dia di Mama, Prome Ministro a dicidi na bishita diferente Cas di Anciano rond di Aruba,

pa asina felicita e Mamanan riba nan Dia.  E ta un tradicion cu e ta haciendo pa 18 aña caba.

   Aki ta momento cu el a yega San Nicolas den su bishita na e casnna di anciano di SABA den Palisiaweg.  Aki el a pasa y saluda tur mama, y demas personanan cu tabata presente e dia aki bishitando nan ser keri.

   Premier Eman a haya chens di combersa cu hopi di nan, kendenan a mustra di ta hopi contento cu e bishita di dje.

   Eman a acompaña y anima nan e dia aki tambe cu acompañamento musical di Robert Maduro y su grupo.  Tur esaki a trece un ambiente festivo estilo serenata cerca tur esnan presente.

   E dia aki a bishita tambe San Pedro Paviljoen na Playa, y na Huize Maris Stella na Savaneta.

   Den cada bishita, e ambiente tabata yena di emocion, sonrisa y gratitud. Acompaña pa su esposa Doina Eman-Neagoy como tambe artista cultural Robert Maduro, cu serenata y musica cu a agrega un toke caluroso, nos grandinan a ricibi no solamente un bishita protocolar, pero un gesto sincero di cariño y reconocemento.

   Dia di Mama ta un di e celebracionnan mas importante na Aruba, un dia dedica na honra e forsa y amor incondicional di mamanan y grandinan cu a forma nos famianan y comunidad.