Cabesante Lisi Werleman-Paris:
Lisi Werleman-Paris, cabesante di Imelda Kleuterschool, a expresa den un entrevista cu DIARIO, cu no tin edad pa cuminza siña e muchanan tocante salud integral.
El a indica cu scol tin un proyecto cu yama “Strong Health” cu nan a caba di cuminza cu ne, den cual nan ta poniendo enfasis riba e habilidadnan special, emocional, cu e muchanan mester tin p’e siña deal cu su emocionnan.
“E emocion ta di bo. Otro hende no por causa cu bo ta bira tristo, por ehemplo. T’abo ta sinti tristeza. Bo mester reconoce kico ta haci bo tristo, y bo ta reacciona riba esaki. Anto, ya pa varios aña caba nos ta evaluando anto nos ta yudando nos mucha nan bira mas fuerte cu esaki, y mas jong nan cuminza, ta miho. Anto, e proyecto di Strong Health aki, nos a cuminza cu ne, nos tin un grupo di maestra cu a bay Budapest na April, cu Erasmus Plus cu cooperacion di SKOA. Awo nan ta hincando e programanan den otro pa lesnan den klas, pa e muchanan siña controla nan emocionnan”, Juffrouw Lisi Paris a relata.
El a agrega cu ta ok pa e mucha ta tristo, e ta ok cu e ta rabia, pero con e ta reacciona pa cu esaki, esey ta haci’e importante.
El a menciona cu scol tambe tin un proyecto pa otro aña unda nan lo bishita un scol na Europa pa wak con nan ta traha cu esaki. El a subraya cu e tema aki a “sluit” perfectamente cu scol su pensamento.”Na e manera ta cu nos kier traha tambe pa reinforza nos muchanan pa crea ciudadanonan fuerte, sigur di nan mes, cu amor propio hopi halto, empathy, amor y responsabilidad pa comunidad”, Juffrouw Lisi Werleman-Paris a remarca.
