Prome Minister Wever-Croes a reuni cu Premier Rutte riba varios punto importante pa pais Aruba

Asamblea General di Nacionnan Uni

*Ta riba e bon caminda pa logra cumpli cu tur proyecto

*Rutte no lo participa mas na eleccion di Hulanda 

ORANJESTAD (AAN): Manera ta conoci, Prome Minister Evelyn Wever-Croes siman pasa a biaha pa New York pa atende e Asamblea General di Nacionnan Uni, na unda pa tres dia largo, el a tuma parti den varios reunion importante.

            Prome Minister a indica cu durante e reunionnan, e tabata tin e oportunidad di papia cu Premier di Hulanda sr. Mark Rutte riba varios punto importante pa pais Aruba, entre otro riba e tema di e retonan general cu e pais ta confronta y riba e negociacionnan cu Hulanda tin cu Aruba na e momento aki.

            Premier Rutte na e ocacion, a elabora riba su decision pa no participa mas na eleccion di Hulanda.

            Tambe, Prome Minister a tuma e oportunidad pa reuni cu Premier di Sint Maarten Silveria Jacobs, na unda nan a delibera extensamente riba con Aruba y Sint Maarten por alinea nan esfuersonan durante e negociacionnan cu tin andando.

             Finalmente, Prome Minister a reuni cu Secretario di Estado Alexandra van Huffelen riba e tema di negociacion.

            "E tres dianan na Nacionnan Uni tabata intenso cu varios reunion largo. Mi ta felicita e staff completo di Embahada y Consulado pa nan esfuerso y dedicacion na haci e evento importante aki, uno exitoso. Pa Aruba un biaha mas, e Asamblea General tabata uno positivo, na unda Aruba como isla chikito den Caribe tabata bon prepara y representa. Nos ta riba e bon caminda, pa logra cumpli cu tur nos proyectonan", Prome Minister a expresa.