*Tin hopi circulando riba medionan social na Aruba
ORANJESTAD (AAN): Recientemente por a nota riba medionan social na Aruba varios publicacion di noticianan falso y materialnan di deepfake ta circulando. Prome Minister a indica cu ultimamente, Servicio di Siguridad Nacional di Aruba (VDA) a detecta un aumento grandi den noticianan falso y material manipula (deepfakes), cu ta wordo uza pa trata di engaña nos ciudadanonan. Un di e formanan mas comun ta via fraude cu crypto, unda personanan ta wordo convenci pa haci inversion y despues ta perde nan placa.
Prome Minister a expresa cu como Gobierno, nos tin e responsabilidad di proteha nos ciudadanonan contra e tipu di abuso aki. P'esey ta pidi comunidad pa keda alerta y sigui algun paso importante y recomendacionnan di VDA.
Con pa reconoce noticianan falso y e asina yama deepfakes
- Controla unda e noticia ta bin. Un solo fuente no ta basta. Verifica e informacion den medio confiabel y oficial prome cu bo kere of comparti.
- Paga tino na e imagen of video. Deepfakes por parce real, pero tin detayenan straño, manera movecion no natural of audio cu no ta cuadra.
- Mira si otro medio confiabel a publica e noticia. Si un noticia no ta wordo confirma pa instancianan oficial, ta miho bo no confia.
- Uza hermentnan di verificacion. Imagen of video por wordo manipula. Uza un r’everse image search’ pa verifica si nan ta autentico.
- Tene cuidao cu oferta di inversion. Scammers ta hopi creativo pa trata di saca placa for di hende. Nunca inverti sin investiga bon prome.
Con bo por proteha bo mes?
- No comparti bo informacion personal cu persona of organisacionnan desconoci.
- Si bo topa noticianan sospechoso, raporta esaki na VDA (11911) of Polis di Aruba (KPA 11141).
- Keda informa y sigui e campañanan di seguridad digital pa bo sa con pa detecta fraude.
"Nos ta compromete pa proteha nos pueblo contra e tipo di engaño aki. Pero nos mester bo colaboracion. Ta solamente via conscientisacion y vigilancia cu nos por combati e menasa di noticianan falso y fraude digital. Mi ta pidi bo pa keda alerta, pensa criticamente, y si bo tin duda, verifica semper prome cu bo actua", Prome Minister a expresa.
