Relacionista Publico di AZV a duna di conoce:
*Antes AZV tabata traha cu intermediario
ORANJESTAD (AAN): Vocero di AZV, Solange Tchong a indica na DIARIO cu pa hopi aña nan ta trahando cu Colombia, como un di e paisnan unda ta manda pashentnan pa haya tratamento medico. Sinembargo, for di dos aña pasa AZV a pone un destaho publico basa riba un licitacion y a invita e clinicanan di Colombia cu AZV ta traha cu nan como tambe otronan cu tabatin interes pa participa na esaki.
Tchong a sigui bisa cu conforme ley, AZV tin e obligacion pa cada cierto tempo cera contrato cu dunadonan di cuido pa keda duna servicio medico na e aseguradonan di AZV. Esaki ta mescos pa loke ta cuido medico den exterior, a subraya.
AZV ta publica tur e rekisitonan cu tin pa participa na e proceso aki di licitacion, pero tambe pa AZV por evalua cu e comision cua ta e puntonan cu tur clinica mester cumpli cu ne.
E puntonan clave cu AZV tabatin e biaha aki tabata na prome luga e servicionan medico cu ta ofrece, calidad, seguridad pa e pashent y banda di esaki ta wak e parti di un prijs husto, cu mester bin den balance cu e otro aspectonan, e PR di AZV a agrega.
Den e caso di Colombia, a splica, ora cu un pashent bay Colombia pa haya tratamento, e aspecto di mas importante ta cu e por haya e tratamento medico cu ta wordo pidi for di e specialistanan na Aruba, cu ta esnan cu ta indica na AZV cu mester manda e pashent afo.
Un otro punto cu AZV tambe ta wak ta e parti total, esta e servicio medico, con lihe ta haci afspraaknan y banda di esey ta wak e parti logistico manera con ta organisa esaki y por ehempel, si e clinica tin un departamento internacional cu por atende cu e clientenan ora nan ta eynan, Solange Tchong a declara.
Tabatin un proceso cu a dura un anja y mey, casi dos anja. Kier a pone mas enfasis riba scucha e 'feedback' di e clientenan. Aworaki a percura pa AZV por a cera un contrato cu tres clinica cu por yuda haci e procesonan na Colombia mas lihe.
Banda di esaki ta interesante ta cu AZV pa prome biaha ta firma contrato directo cu e clinicanan na Colombia. Contrario na pasado, AZV tabata traha cu un intermediario. Asina a bin wak e necesidad di bira mas skerpi riba cierto areanan.
Tin hopi bon experiencia cu Colombia, segun Tchong, y esaki a resulta den un cambio unda antes tabata traha cu 5 of 6 clinica na Colombia. Awor a contrata 3 clinica cu ta Hospital Pablo Tobon Uribe, Fundacion Valle del Lilli, cu ta hospitalnan cu AZV a yega di traha cu nan. Tin tambe Fundacion Cardio Infantil cu ta uno nobo pa AZV, Solange Tchong a duna di conoce.
