ORANJESTAD (AAN): Manera cu ta conoci tin investigacion andando na Arubahuis, y esaki a wordo ordena door di Prome Minister Evelyn Wever-Croes.
Na varios ocasion Prome Minister den tur transparencia a splica cu na e momento cu a bin na su conocemento cu tin algun cos cu no lo ta bayendo bon na Arubahuis, como e minister encarga cu Arubahuis, a pidi Centrale Accountantsdienst (CAD) pa haci un investigacion. E investigacion aki ta andando ainda keto bay, e ta den su fase final, pues mientrastanto no tin mas informacion ‘nobo’ acerca di e tema aki.
Premier Wever-Croes a informa cu e investigacion ta worde tuma hopi serio y tur esnan cu ta haciendo e investigacion ta dedicando hopi tempo na esaki. Prome Minister como e persona cu a inicia cu e investigacion ta sigura cu asina cu e investigacion y e rapport ta full cla, lo informa Parlamento di tur loke cu a pasa. Prome Minister ta enfatisa: “Mi mes ta esun cu a cuminsa e investigacion aki, y mi mes lo ta esun cu lo duna transparencia ora e investigacion keda cla”
Apesar di e transparencia aki ta tuma nota cu oponentenan politico un bes mas ta trata di haci politikeria cu algo serio, kier trata di acelera e proceso of desvia atencion di locual nan mes tin andando.
Pa cualkier motibo cu e ta, Prome Minister Wever-Croes ta pidi pa ban duna tempo, tempo. Alavez ta sigura cu ora e investigacion ta cla, Gobierno lo duna mas informacion y por comenta mas di e contenido di e investigacion.
