Director di AZV, Edwin Jacobs ta splica:
ORANJESTAD (AAN) – Den conferencia di prensa convoca pa e director di AZV, Ir. Edwin Jacobs, el menciona cu den e cuater hospitalnan cu el a bishita na Colombia, el a informa nan cu AZV ta bay cuminza cu e proceso di licitacion (destaho publico).
Dia 1 di September e documentonan unda tin tur rekisito y criterionan lo sali afo, pa e contratonan nobo, y ta spera cu pa otro aña na fin di Maart, lo ta asina leu cu lo por firma contratonan nobo.
En principio, AZV no ta spera cu lo tin reduccion di gasto pero si cu lo contene e aumento di gasto, pues den tempo si ta lague bay e lo crece na un tasa di 5 pa 6% pero AZV kier contene na 2 pa 3%.
“ Mester controla e crecemento di gasto pasobra e perfil di salud di nos hendenan ta keda preocupante y ta keda e necesidad di tin cuido specializa den exterior. Esaki ta parti di e subida di eficiencia; nos ta mehora e aspecto di e parti clinico tambe, pesey e invitacion ta sali na September y nos ta spera cu ya pa Maart nos tin contratacion”, Edwin Jacobs a reitera. El a agrega cu AZV ta wordo asesora den e caso aki, tambe door di terceronan pa asina e proceso aki lo cumpli cu tur e rekisitonan cu por expect di un bon licitacion.
Jacobs a informa tambe cu na Colombia, AZV tin un broker, cu ta un grupo cu ta asisti AZV den e partinan logistic, y tambe tin un auditor. “RGC cu ta un compania cu ta audit e recibonan. Ora cu un hospital ta bay cobra AZV, prome cu e yega cerca nos e ta audit door di un compania eybao pa wak cu locual ta wordo poni na tratamento ta cuadra cu otro y cu e prijsnan ta cuadra cu loke nos a cumbini cu otro”, Edwin Jacobs, director di AZV a señala.
