ORANJESTAD (AAN): Por medio di un feria educativo virtual completamente gratis, studiante y profesionalnan na Aruba tambe lo tin acceso na oportunidadnan pa enseñansa avansa na Merca.
EducationUSA den colaboracion cu Departamento di Estado y Embahada di Merca ta invita studiante di enseñansa secundario y universitario como tambe profesionalnan di diferente area di trabou pa participa na e tercer edicion di EducationUSA Virtual Fair.
E feria virtual ta un evento gratis unda lo ricibi informacion for di 80 diferente instituto di enseñansa avansa (Colleges y Universities) na Merca.
Den un ambiente completamente virtual, participantenan ta ricibi acceso na varios espacio unda lo brinda diferente tipo di informacion. Por ehempel, na e Auditorium por encontra sesionnan en bibo ‘live sessions’ y esnan a base di peticion ‘on-demand’ riba topiconan di relevancia pa cada participante. Na e Exhibit Hall, lo tin standnan virtual di e diferente institucionnan unda cu e studiante por chat cu representante di cada organisacion y tambe cu conseheronan di EducationUSA.
Banda di e aspecto educativo, lo tin espacionan interactivo manera un Photobooth y un Leaderboard unda cu pa diferente actividad riba e Fair Platform participantenan ta ricibi punto.
E evento online pa Aruba ta tuma lugar diaranson, 24 augustus di 4:00 p.m pa 7:00 p.m
Durante e feria virtual participantenan lo ricibi tur informacion corecto, comprensivo y actual tocante e proceso di aplicacion, rekisitonan y sosten financiero pa studia na Merca.
EducationUSA ta un red di e Departamento di Estado di Merca. E red ta consisti di mas cu 430 centro y nan ta estableci na mas cu 175 pais y teritorio globalmente.
E centronan ta brinda informacion y conseho pa studiantenan cu ta biba pafo di Estados Unidos. EducationUSA ta promove enseñansa avansa na Merca na studiantenan den exterior, incluyendo Aruba, door di brinda informacion corecto, comprensivo y actual tocante oportunidadnan existente pa studia na institucionnan universitario acredita na Merca.
