Dentro di poco lo presenta e plan di maneho 2022 - 2025 di Departamento di Asunto Social

ORANJESTAD (AAN):  Minister Rocco Tjon, dialuna a haci un bishita na Departamento di Asunto Social y

den cuadro di esaki el a convoca un rueda di prensa caminda el a bisa cu we bishita a cuminsa mainta na J.F. Kennedy Center unda a haya un splicacion amplio di e Seccion di Guia Social.

E mandatario a expresa cu ta hopi impresionante e trabao cu nan ta haci toch cu e tiki recursonan cu nan tin.

Tjon a bisa cu el a haya e bishita aki hopi importante pasobra hopi biaha ta wak Sociale Zaken como un instancia cu solamente ta percura pa duna e bijstand na esnan cu tin mester di esaki. "Pero ta un organisacion mucho mas dinamico cu ta brinda masha hopi servicio na tur esnan cu mester di e ayudo aki".

Pakico a scoge pa realisa e bishita aki? El a indica cu dentro di poco lo presenta e plan di maneho di 2022 te cu 2025 y e ta haya importante cu e trahadornan mes por brinda nan ideanan y wak den ki forma por acapara esaki den e plan di maneho cu ta bay presenta.

 E retonan cu ta wordo confronta cu ne tin di haber cu e parti di personal. Gabinete Wever-Croes II a opta pa den presupuesto 2022 percura tambe pa e prolongacion di e diferente contractonan relaciona cu Sociaal Crisis Plan pa asina por duna continuacion na e diferente programanan, Minister Tjon a duna di conoce.

E mandatario a remarca cu su ministerio lo brinda e departamento aki e asistencia necesario no solamente den e parti financiero, pero tambe den e parti tecnico pa e programanan cu nan ta bezig cu ne.

El a laga sa cu entre otro, pronto lo anuncia un digital loket pa loke ta e parti di bijstand.

Finalmente Minster Rocco Tjon a duna di conoce cu ta hopi contento di por mira con e fase 1 di e renobacion di e edificio di Sociale Zaken na Lagoen ta kedando cla.

Pronto lo inicia e fase 2 mientras cu fase 3 ta caba den preparacion. Si tur cos bay bon pa fin di otro aña lo wak un Directie Sociale Zaken cu un infrastructura completamente nobo, mientras cu pa loke ta e organisacion mes, lo sigui haci e inversionnan necesario, a indica.