ORANJESTAD (AAN) – Prome Minister Evelyn Wever-Croes, a toca otro temanan den conferencia di prensa, y den cuadro di Covid-19 a referi na e ayudo di paketenan di cuminda pa esnan den mas necesidad, Loonsubsidie y FASE,
ademas di e tema di cortamento di salario di empleadonan publico cual DIARIO lo ubica den articulo apart.
PAKETE DI CUMINDA:
E mandatario a splica cu Hulanda bisa cu nan a yuda cu paketenan di cuminda pa e temponan aki, pero entrante 1 di Juli, Gobierno di Aruba mester tuma e parti aki over.
“Pues, nos ta trahando riba esaki pa asina percura pa tur hende cu ta depende di pakete di cuminda di Cruz Cora na Juni ainda, sigui haye na Juli tambe.
E lunanan Juli, Augustus, September ta placa cu Hulanda ta regala nos; ainda ta costo di Hulanda pero despues di esey Aruba mes mester paga pe, y esey tambe nos ta trahando riba dje, pasobra nos no ta bay laga ningun hende na caya”, e dignatario a expresa.
E mandatario a subraya cu por ta tin exigencia, cu e hendenan mester registra di nobo, pasobra e sistema ta bay cambia.
“Cruz Cora ta stop di hacie, y gobierno ta bay hacie awo. Pero e meta ta pa ningun hende keda sin haya e ayudo. Esey mi kier sigura na henter e comunidad di Aruba”, Prome Minister a expresa.
LOONSUBSIDIE Y FASE:
Pa locual ta FASE y Loonsubsidie, ta proyectonan cu gobierno tin, cu ta andando y cu lo sigui na vigor.
“Cuminzando cu loonsubsidie, e subsidio cu gobierno ta duna doñonan di trabao pa nan mantene hende na trabao, ta bay sigui. Hulanda ta subsidia e proyecto aki.
FASE ta un otro proyecto. Esaki ta un proyecto cu Hulanda no ta subsidia. E ta un proyecto cu Aruba mes a bin cune, ora cu e crisis a dal, pa evita cu hendenan ta keda sin nada den nan man.
“Nos a actua hopi lihe. Nos a bin cu e proyecto aki y aworaki nos ta buscando un forma pa transforma FASE den lo que ta bay bira TIO, y esaki ta algo mas structural. No kiermen cu hendenan ta bay perde nan entrada, pero si ta bira mas structural. Minister Glenbert Croes ta trahando riba esaki, pa asina e grupo di persona cu ta den FASE, atravez di TIO haya un sosten pa yega bek na para riba nan pia y haya un trabao bek”, e dignatario a duna di conoce.
Minister Presidente a expresa cu Aruba su economia ta cambiando y cu e pandemia a cambia hopi cos. “Tin hopi trabao cu por ta hendenan tabata haci antes y a perde trabao cu despues no ta bay tin mas. Anto, atravez di e proyecto aki ta bay yuda hende pa transforma esey, pero Minister Glenbert Croes ta esun cu ta encarga y e lo duna mas informacion riba dje. Pero no tin ningun riesgo cu FASE ta bay stop. FASE ta bay sigui tanten cu ta necesario”, e dignatario a señala.
Minister Presidente a expresa si, cu e kier mira cu e trend sigui, cu cada luna menos hende ta depende di FASE, pasobra esey kiermen cu mas hende ta hayando trabao. El a bisa cu esaki ta hopi importante pa subraya.
