Ambulans na Aruba a transporta un total di 760 pashent di Covid-19

ORANJESTAD (AAN): Na Aruba tambe ta celebra “Siman di Ambulans”.  Esey ta loke e hefe di Servicio di Ambulans di ImSan, esta Liberato Hoek a indica den un entrevista.

   El a splica cu esaki ta un siman hopi importante pa nan, pasobra e ta un siman unda henter e personal ta reflexiona riba loke a socede den e aña cu a transcuri. Mirando cu ainda e pandemia tey, Hoek a mustra cu tur esnan trahando na Ambulans a siña di esaki.

   “E tabata realmente un aña hopi pisa, si bo djis tene na cuenta e hecho cu como 10.800 persona a contagia cu Covid-19 na Aruba, tin di corda cu Ambulans a transporta por lo menos 760 pashentnan aki.  Esaki ta un promedio di 50 pashent pa luna, aunke e luna di Januari 2021 e tabata esun cu a haci mas transporte, esta di 130 pashent,” Hoek a indica

   E transporte di 130 pashent durante luna di Januari cu a pasa, tabata un peso extra pa e personal di Ambulans na Aruba, segun Hoek ta admiti.

   Toch tin di corda cu ademas di preveni, e personal di Ambulans semper ta tuma tur precaucion y toch e ta keda algo fastioso pasobra e personal tin famia y yiu chikito y tin di haci lo maximo pa evita cu nan tambe ta wordo contagia.

   Liberato Hoek tabatin un elogio grandi pa e personal di Ambulans cu di nan banda a duna tur loke nan tabata por, y tambe pa e sosten cu nan tabata ricibi di e famia di e trahadornan.

   E Siman di Ambulans aki a cuminza cu un misa na Kapel di Alto Vista.