Prome Minister ta felicita graduadonan di EPI di Sector Ciencia y Tecnologia

ORANJESTAD (AAN): E siman aki a tuma luga graduacion di studiantenan di EPI di e Sector Ciencia y Tecnologia.

Prome Minister Evelyn Wever tabata presente na e ocasion special aki representando Gobierno di Aruba. Premier Wever - Croes a desea cada un di e graduadonan pabien cu e logro di obtene nan diploma y alabes a desea cada uno hopi exito den e siguiente etapa den bida.

            “E ta yena mi cu orguyo pa mira nos hobennan graduando di Colegio EPI di Sector Ciencia y tecnologia, y di e forma aki formando boso futuro y futuro nos pais,” Prome Minister Wever - Croes a expresa.

            Educacion ta e pilar y base firme y fuerte di nos bida. Awe cada graduado ta mira cu tur e esfuersonan, tur e anochinan sin drumi y studiando ta duna su fruto. Den e otro etapa di bida aki, algun lo bai traha y otronan lo sigui studia. Mirando padilanti, ta importante pa sa cu lo encontra otro tipo di retonan bo dilanti. Pero nunca laga e retonan ey, kita bo di bo meta. Fiha bo meta, y bai p’e. Keda semper enfoca riba bo metanan, cu determinacion, positivismo y fe bo ta logra.

            Premier Wever - Croes durante su speech a referi na Minister Endy Croes cu ta enfatisa riba e  4 D-nan: Deseo, Disciplina, Dedicacion y Determinacion y con pa aplica esakinan. Fiha bo deseo/bo meta. Aplica disciplina, keda traha duro riba dje. Mustra dedicacion na yega bo meta, bo estudio of bo trabou. Y no laga nada stroba bo, pasobra cu determinacion bo ta logra.

            Den nomber di Gobierno di Aruba Premier Wever - Croes a gradici henter e staff y personal di docentenan cu ta esnan cu a guia cada un studiante pa yega na e exito aki. Y a duna danki tambe na mayornan y demas famianan cu tambe a brinda sosten y a kere den e studiantenan.

            Pa conclui, Prome Minister a bisa cu Aruba ta saliendo di e pandemia, y ta temponan cu ainda tin retonan hopi dificil, pero lo sigui traha na recuperacion di nos pais. Aruba mester di nos tur! Masha pabien na tur graduado y hopi exito den futuro.