LabHOH pronto cu sistema nobo integral pa mehora eficiencia y calidad

Training intensivo pa setup e programa GLIMS

ORANJESTAD (AAN): Recientemente LabHOH a firma acuerdo cu e compania Clinisys/MIPS pa un sistema completo pa LabHOH. GLIMS ta para pa “General Laboratory Information Management System” y ta un programa unda cu tur informacion y e pasonan ehecuta durante di test lo wordo procesa. 

            Lo integra e procesonan di ‘Klinische Chemie’ y di Microbiologia. No solamente informacion di e 'analyzers' cu ta haci e trabou di analisa pero tambe e trends, informacion di Hospital y di dokternan. Resultadonan lo wordo comunica via e sistema aki tambe bek pa esnan cu a haci e peticion. Pues, nan lo por ricibi e diagnostico mas rapido y den forma digital cu tambe lo beneficia e pashent.

            Bentaha ta cu lo tin un (1) sistema digital cu ta completo y mas avansa pa traha cu ne y ta full electronico.  E sistema ta cumpli cu tur rekisito cu ta wordo exigi di un sistema di laboratorio riba nivel internacional, alabes ta contribui na e acreditacion di LabHOH. Ademas, hopi proceso cu ta sosode manual pronto lo bay over riba proceso digital cu lo minimalisa erornan y eleva e calidad na un nivel mas halto. Coleganan di LabHOH a ricibi durante e simannan cu a pasa training bou guia di e compania ARCAS Partners pa asina termina e setup y cuminsa traha den e sistema nobo aki. 

            Patrick van den Brink, Customer Services manager Clinisys/MIPS tabata na Aruba como lider di e proyecto pa educa y guia empleadonan den e sistema nobo. Nan a cuminsa setup e sistema conectando e aparatonan, hinca e asina yama ‘bepalingen’ y sigui traha y practica cu e sistema.

            Basa riba su experencia cu e programanan den pasado, Steven de Cuba, applicatiebeheerder LABHOH, a splica cu desde comienso te cu awo esaki lo ta di tres cu e ta traha cu ne. E bentahanan grandi awo ta cu tin hopi funcionalidad cu no tabatin den e sistemanan anterior. E progreso ta hopi grandi y ta bira mas facil, e ta mas ”userfriendly” “, mas funcionalidad, y pues cu alfinal ta brinda mas y miho servicio na comunidad di Aruba.

            Pa e pashent- y dokternan, e sistema moderno aki ta duna mas posibilidad. E dokternan por haci e peticion digital ora cu e implementacion di e sistema ta cla y por hacie via e sistema mes. Den futuro cercano e pashent tambe lo por bay ricibi e resultado digital. Cu esaki LabHOH ta eleva su servicionan cu e pashent na prome luga.