Prome Minister ta felicita e comunidad Colombiano riba nan Dia di Independencia

ORANJESTAD (AAN): Gobierno di Aruba diahuebs 20 di juli a uni cu e comunidad Colombiano na Aruba den e celebracion di nan di 213 aña di independencia.

E Consulado General di Colombia, Sr Gustavo Serrano Amaya, a organisa un ceremonia protocolar riba Plaza Simon Bolivar pa conmemora e fecha y a hiba palabra na inicio di e celebracion.

Presente na e ocacion tabata Cuerpo Consular Aruba y directornan di Departamentonan di Cultura, Censo y DBB. Minister Ursell Arends, como Vice Premier, Presidente di Parlamento señor Edgard Vrolijk y Minister Glenbert Croes tambe a hiba palabra. Tambe a tuma luga ofrendanan floral.

Na Aruba tin un colonia grandi di Colombiano ta biba, algun ya pa di tres generacion. Danki na tur ciudadano Colombiano cu a laga nan hogar pa bin yuda nos desaroya nos economia y a keda den tempo bon y den tempo menos bon. Colombia ta hunga un papel hopi importante den nos economia y salud y Gobierno di Aruba kier sigui desaroya y mantene e lasonan ak.

Prome Minister ta gradici e comunidad di Colombia y alabes ta felicita nan cu nan Dia di Independencia. “Aruba ta den recuperacion y ta necesario pa nos keda uni pa asina hunto nos logra vence cada reto nos dilanti den bienestar y progreso di nos comunidadnan. Pabien na e comunidad di Colombia residencia na Aruba y danki pa boso contribucion na economia di nos pais”, Prome Minister Evelyn Wever-Croes a expresa.

Prome Minister ta gradici tambe DOW pa e trabaonan di limpiesa cu a wordo haci riba Plaza Simon Bolivar en conexion cu e ceremonia protocolar di celebracion di Dia di Independencia di Colombia.