En conexion cu Dia Internacional di Hende Muhe:
ORANJESTAD (AAN): Manera ta conoci dia 8 di Maart ta dia Internacional di Hende Muhe. Pa Gabinete Wever-Croes e fecha aki ta uno hopi importante na unda tur aña ta celebra e logronan di nos hende muhenan.
E aña aki, Gobierno di Aruba lo organisa un conferencia cu e tema" Empoderando hende muhe y mucha muhe, bo ta empodera henter mundo", cu lo enfoca riba e importancia di empodera nos hende muhe y mucha muhenan, y tambe riba e influencia cu esaki tin riba nan y nos futuro generacion.
Prome Minister a expresa cu danki na e trabou incansabel di tur esnan prome cu nos, nos ta akinan awe. Nan ta esunnan cu no solamente a kere den nos hende muhenan sino a brinda nan e espacio pa realisa nan soñonan.
Danki na e pasonan exitoso cu nan a tuma, awe nos por para akinan orguyoso di tur locual nos ta logrando. P'esey ta importante pa no laga e dia importante aki pasa bay, y celebr'e tur aña den compania di tur nos sernan femenino. Mester celebra e logronan di e hende muhenan prome cu nos, di e generacion aki, y mester cuminsa prepara pa e exitonan di e generacionnan cu ta bin.
Pa cu e dia importante aki, Prome Minister ta extende un invitacion na nos hende muhenan pa reserva e fecha di 8 di Maart na unda lo tin un celebracion di 2 pm pa 5 pm. Informacion pa cu e celebracion aki lo ta disponibel riba pagina di facebook di Gabinete Wever-Croes II, na unda lo tin un link pa por haci reservacion.
Prome Minister ta spera di por conta cu cada un di boso pa asina hunto celebra y confirma e compromiso di nos como hende muhe pa sigui ta exitoso den futuro.
