Director di SVb Edwin Jacobs ta indica:
*Den cuadro di Ley di seguro y accidente
ORANJESTAD (AAN) – Director di SVb, Edwin Jacobs, a sigui splica den entrevista cu DIARIO, cu SVb ta traha tambe den cooperacion di diferente departamento di Gobierno, entre nan DIMAS.
DIMAS ta controla si e persona cu a haya un permiso di trabao ta registra na SVb, y si e no ta registra e ta nenga e permiso. El a señala cu tin dunadornan di trabao kier haci sabi, ta core registra e trahado ultimo ora pa nan haya prolongacion, pasobra nos ta bay bek wak si el a wordo registra for di momento cu el a haya su prome permiso. “E ta bin cu boet, y mas e ta dura den tempo mas pisa e boet ta”, Edwin Jacobs a subraya. El a agrega cu for di 2013 SVb tin e cooperacion aki cu DIMAS. “Aworaki nos a haya un palabracion tambe cu Departamento di Impuesto, cu nos a forma un grupo di proyecto pa nos bay traha riba intercambio automatico di informacion, entre e dos archivonan di belasting y di SVb cu ta e trahado, y esey ta bay yuda tambe pa cumplimento belasting y di SVb”, Jacobs a informa.
El a agrega cu e di tres departamento cu SVb ta cerando acuerdo cu ne, cu ta den cuadro di reforzamento di cumplimento di Ley, ta Imigracion, den cual Warda Nos Costa ta cay.
“Anteriormente caba, nos tabata tin un acuerdo cu Warda Nos Costa, cu na momento cu nan haci un control na pia di trabao y nan constata cu tin trahado cu status indocumenta, e ora ey nan ta haci nan trabao sea pa deporta of haci loke mester haci cu e persona, nos tin palabracion cu nan mester informa p’asina nos bay bek na e dunador di trabao, pasobra den e caso aki tin ambtenaar huramenta, cu a constata un desviacion den bo empresa, nos ta bay bise cu e persona aki tabata traha cerca dje; e por tabata indocumenta of no, e ta su problema cu DIMAS y Warda Nos Costa, pero e tabata trahado p’e y e no a registr’e na SVb, por lo tanto e ta bay haya un boet”.
Jacobs a indica cu aworaki ta bay reactiva despues di un periodo cu WNC no tabata mucho activo, pero awo cu e ta activo bek ta bay cera e acuerdo atrobe pa SVb haya e informacion aki bek y bisa e dunador di trabao cu e ta bay haya un problema cu ne, pasobra e tabata tin un trahado den su servicio, cu e no tabata registra conforme e ley di seguro di malesa y accidente, cu ta conduci na multa.
