Monique Giel, profesional di WGK:
*Algo hopi di lamenta!
ORANJESTAD (AAN) – E profesional di Wit Gele Kruis, señora Monique Giel, a elabora den entrevista cu DIARIO, tocante e tema di mucha di 0-pa 5 aña y adolescentenan, cu mester ta safe durante actividadnan di carnaval 71.
Monique a reafirma cu WGK ta forma parti di e campaña tambe, pero e aspecto cu nan ta enfoca riba dje e muchanan di 0-5 aña, pero tambe e teenagers.
“Mucha di 0-5 aña, sigur nos no ta recomenda pa bay carnaval, pasobra ainda e muchanan aki no ta conciente di kico ta un carnaval, kico esaki ta significa y pakico tin cu celebr’e. Pesey nos ta conseha mayor pa su yiu di 0-5 aña keda na cas”, el a declara.
Aunke e mes no tabata presente, si el a bin compronde di varios colega cu durante Jouvert Morning tabata tin hopi mucha bao di cinco aña, locual ta algo hopi alarmante.
“Pero si bo bay bek wak nan mayornan, nan mama cu ta esun cu tin cu take care di nan yiu, bo por wak atrobe cu e mama tabata bao influencia di alcohol masha pisa mes. Importante ta pa nan bay y nan ta hiba e yiu, of ta lague na cas y di mes e muchanan ta sali bay, pasobra nan a haya hopi mucha den edad di cinco aña y menos, riba caya. Y e ora ey instancianan ta cay aden y ta tuma e muchanan aki over, y despues cu e mayornan, e mama bin realiza ya e muchanan a wordo hiba na un internaat”, Monique Giel a expresa.
Giel a expresa cu esaki ta hopi di lamenta. Pasobra e conseho cu WGK ta duna ta pa laga e mucha cerca un famia cu e mayornan sa cu ta bay cuid’e bon.
“Importante ta pa busca pa bo yiu ta safe, y un carnaval safe ta e lema cu nos ta hiba. Y tambe cu e oranan ey ta oranan cu e muchanan ta drumi. Durante e dia, ora di e parada tambe tabata tin mucha hopi chikito, pabao di cinco aña pero baby tambe. Bo sa kico esaki ta nifica pa e baby: e solo, e lechi materno cu e no ta haya na tempo, por ta e lechi frio cu e tin cu bay bebe cu tur e consecuencianan cu esaki ta trece pa su salud, esey ta importante pa mayornan ta conciente, e mamanan ta conciente cu si e no tin lugar safe pa laga bo yiu, bo yiu ta bira grandi y despues bo por enjoy bo carnaval. Importante ta pa bo brinda e seguridad pa bo yiu” Monique Giel a remarca.
