ORANJESTAD (AAN): Diahuebs Prome Minister Evelyn Wever Croes a tene un conferencia di prensa, relaciona cu bishita di Secretario di nobo di Estado di Hulanda Alexandra van Huffelen.
E Prome Mandatario a cuminza na gradici e Secretario di Estado y gobierno Hulandes pa tur e sosten cu nan a duna nos isla durante e pandemia di Coronavirus.
No solamente e sosten financiero, sino tambe e sosten tecnico, mirando cu mayoria pais na mundo no tabata prepara pa e tipo di pandemia aki y sigur no Aruba, segun Wever Croes.
El a sigui bisa cu COVID-19 tabata tin un impacto enorme riba nos pais Aruba tabata un di e paisnan mas afecta pa e pandemia, debi na nos dependencia grandi riba turismo.
“Prome cu Corona nos tabata ocupa caba cu otro crisisnan manera e crisis social y e crisis di Venezuela y cos tabata bayendo relativamente bon”.
Na 2018 y 2019 prome cu Corona nos a conoce un bon crecemento economico cu surplusnan y nos tabata preparando pa asina paga e debe di estado cu nos tin.
Lamentablemente COVID-19 a yega, door di cual tur cos a bay den un otro direccion, segun e Proem Mandatario.
Wever-Croes a sigui bisa cu economia casi a cay den otro por completo, pero cu e Arubianonan mesora a cuminza traha duro pa drecha e pais bek.
“Sin e sosten di likidez esaki no tabata posibel y e momentonan aki nos ta den un fase di recuperacion, unda cu nos a cera aña pasa cu un recuperacion di 72% di turismo, segun e Prome Minister.
El a sigui bisa cu tur cos ta indica cu Aruba como un di e promenan di e region aki ta pafo di e ola di Omicron.
Wever-Croes a indica cu bishita di e Secretario di Estado ta mas tanto un oportunidad pa conoce otro, pero cu naturalmente a papia riba e temanan cu ta retonan pa Aruba, unda cu a intercambia ideanan riba esakinan.
“Aruba ta den pleno ehecucion di e plannan di reforma y nos tur ta realiza cu sin reformanan, un recuperacion no ta posibel”.
Mi ta aprecia cu e Secretario di Estado asina trempan despues di su nombramento a dicidi di bishita Aruba y esey ta un indicacion cu e Secretario di Estado tin curazon pa e paisnan den Reino, segun e Prome Mandatario.
