AVP mester di un lider cu tin derecho moral pa dirigi Pueblo --- *Maneho destructor di Mike ta duna contenido total na COHO --- *Orguyosamente Aruba lo atende cu e santana financiero di Mike
ORANJESTAD(AAN)—Na 2020 ora pandemia a bati na porta di mundo y Aruba mester a bay pidi yudansa Hulandes, Reino a presenta un exigencia, cu a hiba Aruba directamente na e origen di su dolor.
Reino Hulandes a introduci e areglo di COHO, e “Caribisch Orgaan voor Hervorming en Ontwikkeling” (Organo Caribense pa Reforma y Desaroyo).
Un momento historico pa Aruba cu ora el a haya su Status Aparte na 1986, hamas por a pensa cu na 2020 e tabata den un situacion, cu a haci cu oficialmente e mester a acepta COHO pasobra mes tabata coho y no por a sigui dilanti riba su pia.
Ora analisa kico a pasa cu Aruba, cu a bira coho for di 2009 ora el a cay den man di Mike Eman, mester mira e condicionnan cu ta conduci na e condicion di “coho”.
Den caso di Aruba, na 2009 Mike Eman pa e haya voto y popularidad, a kiba e dos pianan di Aruba y a laga e pais den un estado cu por cualifica como coho.
Na 2007 Aruba tabata den un situacion fastioso cu e mester a introduci OB.
Tabata uno di e momentonan mas dificil di historia di Aruba, cu no tabata so den e situacion aki.
Mundo a habri Siglo 21 despues di un cadena di crisis di petroleo, cambionan significante cu a costa placa y un recesion mundial.
Aruba a dicidi pa OB, cu nos tambe a rechasa pa motibo di e sistema acumulativo.
Na e momento Aruba ya mester tabata cauteloso cu e situacion financiero y economico local, debi na e hecho cu e situacion di petroleo mundialmente tabata tin impacto riba companianan di refineria.
Valero tampoco tabata stabilidad mas pa Aruba, cu mester a yega na acuerdo extra pa finalmente Valero cera su porta.
Mike Eman a hipnotisa Aruba cu su magia inexplicabel y a ciega un Pueblo cu su palabranan bunita, cu realmente ta un insulto pa un Arubiano cu educacion normal pa Pueblo di Aruba.
Mike Eman a ciega Pueblo di tal forma cu nan a permiti Mike y su gang, di kibra pianan di Aruba.
Ta Hulanda a habri wowo di Pueblo di Aruba, cu no por a kere cu e show di Mike den Fort Zoutman tabata un acto di circo di un homber, cu a drenta welga di hamber den Fort Zoutman.
Pakico Mike no a tene welga di hamber den su Penthouse? Un pregunta cu nunca lo haya contesta.
Mientrastanto Aruba a keda coho.
Na 2017 ora Aruba no por a para riba su pia mas, Mike a bay sconde. Cuatro aña largo Mike a keda scondi mientras Evelyn Wever-Croes mester a mira con Aruba ta sigui cana den futuro, cu Mike a pone na palo di horca di Citgo.
Na 2020 ora pandemia a ataca Aruba, Mike a bolbe na momento cu Aruba, cu el a laga coho, a wordo confronta cu e ley di COHO di Hulanda cu a declara autonomia di Aruba coho y awor mester yuda reforma y percura pa un dia Aruba por uza su pianan atrobe pa cana.
Awor Mike ta bin papia di e hospital, cu el a haci impagabel pa motibo di e areglo financiero cu el a aplica y cu Pueblo mester paga “orguyosamente” como parti di e santana financiero cu Mike a laga atras pa Pueblo.
Mike Eman no tin base moral pa critica ningun hende na Aruba. Mike Eman no tin e base moral pa presenta su mes como posibel lider di Aruba.
Mike a fracasa ayera ora el a crea un cementerio pa bienestar di Aruba, cu el a laga coho, den estado di “Descansa na Paz”.
Pa colmo como gobernante Mike no a mira kico tabata pasa cu terenonan di Aruba, cu permisonan cu tabata wordo duna na Arubianonan, pa no papia mes di e Refineria di Aruba, cu mester a bira centro di Nicolas Maduro, man drechi di Putin pero tambe busca mescos cu hopi den Citgo dor di autoridad Mericano cu ta papia entre otro di labamento di placa di Citgo.
COHO ta bira realidad di Aruba. Coho, cu ta describi e estado cu Mike Eman a laga Aruba atras, despues cu el a destrui e pais cu awe e kier bolbe goberna cu e chens cu ni cadaver ta resta di Aruba!
