Defensor di Pueblo ta splica riba e procedura:
*E ley ta hopi simpel, segun Jurima Bryson
ORANJESTAD (AAN): Pa por presenta un keho formal na Bureau Ombudsman, e ciudadano mester demostra cu el a haci esfuerso pa trata di resolve e conflicto cu e instancia concerni. Esaki ta un paso esencial den e proceso di keho, segun e reglamento vigente di e institucion.
Bureau Ombudsman ta un recurso pa esnan cu no a logra solucion na nivel di e instancia mes, pero no ta sustitui e via normal di reclamo interno, segun Ombudsman, Sra. Jurima Bryson.
E instancianan concerni, esunnan cu ta cay den cuadro di ley, mester hacie facil pa un ciudadano por entrega un keho of inkietud cerca nan, el a indica. Nan mester tin un sistema hopi simpel manera un formulario, un espacio riba nan website, un email address, un number di WhatsApp caminda un ciudadano entrega nan inkietud.
Na momento cu un ciudadano acerca Bureau Ombudsman, nan lo puntra na ki forma e persona a trata di resolve e prome aki cu e instancia. Si e no a haya e posibilidad pa entrega su inkietud na e instancia e ora esey no ta e procedura corecto. Esey no ta parti di e conducta apropia. E instancia mester ta accesibel y e ciudadano mester por yega na dje, Bryson a duna di conoce.
Unabes cu a cumpli cu esey, e keho mester regarda un di e instancianan cu ley ta indica. No ta tur instancia Bureau Ombudsman por trata keho contra dje. En general nan ta instancianan di gobierno of instancianan cu ta haci tareanan di gobierno. Tambe companianan estatal, companianan di utilidad, pero tambe instancianan priva cu ta haci tareanan general y ta ricibi fondonan di gobierno cu por ta fundacionnan, entre otro, Ombudsman a splica.
El a agrega cu ora di papia di Kinderombudsman, cu ta trata di mucha y hoben, riba area di cuido, medico enseñanza, e ora eynan si e instancianan aki ta den cuadro di e ley.
Jurima Bryson a laga sa cu tur hende por entrega un keho numa cu si e no ta cumpli cu e rekisitonan e ora Bureau Ombudsman no por trata bo keho. Ley ta bisa tambe cu Bureau Ombudsman por duna asistencia na momento cu ta pone e keho riba papel y ley ta bisa tambe cu tin cierto rekisitonan manera nomber, adres. E ley aki ta pa tur hende. No ta pa ciudadanonan di Aruba so, pero pa tur hende contal cu ta cumpli cu tur rekisito. Un turista por entrega un keho. Un otro instancia por entrega un keho.
E ley ta hopi simpel y no ta traha pa stroba ningun persona di entrega keho, el a remarca.
