Rino Hermans di CMO a splica:
ORANJESTAD (AAN): Durante "Caribe Wave 2025' ta bay tin invitadonan internacional cu lo ta na Aruba pa evalua Aruba su capacidad door di e desaroyo cu ta tumando luga pa loke ta e lansamento di e 'Multi Hazard Early Warning System' (MHEWS). Asina Rino Hermans di Crisis Management Office (CMO) a duna di conoce.
Aruba ta birando un 'role model' pa otro paisnan door di e sistema aki, el a agrega. Banda di esaki ta bay tin lansamento di e App, cu ta mescos cu WhatsApp cu ta dedica solamente na risico
CMO ta purba na informa mas tanto posibel door di e tecnologianan disponibel awendia, pero ta keda kere den e trabao di prensa ya cu prensa ta e weso di lomba durante un desaster pa trece e informacion na ora y concreto na comunidad, Hermans a expresa.
Durante e training aña pasa Aruba a hacie bon. SKOA a evacua muchanan di 4 aña te cu scol secundario. Esaki tambe ta importante pa departamentonan di gobierno, hotelnan pa nan revisa nan protocolnan di seguridad. E aña aki ta bay conta cu participacion di Hospital y tambe nan personal lo wordo evalua.
Den e caso aki, CMO ta bay wordo evalua pa nan capacidad y conocemento. Pesey esaki ta bay ta un training importante pa Aruba, pero e acento ta biniendo for di UNESCO pa purba motiva miembronan di prensa pa registra riba 'tsunami zone' pa tin un bista cuanto 'input' tin cu haci na prensa pa asina prensa por ta participativo den esaki.
'Caribe Wave 2025' cu ta un training/simulacro di tsunami pa region di Caribe ta bay tuma luga diahuebs 20 di maart.
