Prome Minister Mike Eman hunto cu varios boluntario a celebra cendemento di luz di Pasco na San Nicolas

Bernhardstraat a keda bunita

ORANJESTAD (AAN): Pa di prome biaha den su historia, Bernhardstraat na San Nicolas a haya iluminacion di Pasco. Diaranson anochi, 14 di october, Prome Minister mr. Mike Eman hunto cu Minister Rene Herde, Minister mr. Wendrick Cicilia, parlamentario Otami Thomasia y varios boluntario a presencia e cendemento di e luznan di Pasco. E momento historico aki ta marca un paso mas den e proyecto di revitalisacion di Bernhardstraat, caminda pa casi seis luna caba un grupo di boluntarionan ta dedica nan diasabra ta verf cas.

   E ambiente tabata yen di alegria y orguyo, specialmente entre e boluntarionan cu durante e ultimo seis luna a dedica nan tempo liber na e proyecto. Loke a cuminsa cu un grupo chikito di ciudadano cu ta reuni tur diasabra pa verf cas, poco a poco a crese den un iniciativa cu ta haya mas apoyo di nos comunidad. Prome Minister Mike Eman a expresa su satisfaccion cu e resultado di e esfuersonan cu ta tomando luga na Bernhardstraat. Eman a recorda con e proyecto a cuminsa cu un grupo chikito di boluntario, pero cu pocopoco mas hende a bin yuda y e entusiasmo pa contribui na e revitalisacion di San Nicolas a sigui crece.

   Prome Minister Eman a remarca cu e trabounan di verf a cuminsa duna resultado y e caya a haya un apariencia hopi mas atractivo, a surgi e idea pa tambe trece e ambiente di Pasco na Bernhardstraat. Pa logra esaki, a haci un peticion na Departamento di Obra Publico (DOW), cu e deseo pa San Nicolas e aña aki no keda ultimo, pero ta entre e prome luganan na Aruba cu ta haya iluminacion di Pasco. Cu cooperacion di N.V. Elmar y DOW, e deseo aki a bira realidad. Elmar a encarga cu e preparacionnan y instalacionnan electrico necesario, mientras DOW a contribui cu e conexion di e decoracionnan di Pasco.

   Momento historico: John Hassel, presidente di Stichting Revitalisation Bernhardstraat, a destaca e importancia di e momento aki pa San Nicolas. Bernhardstraat ta un di e cayanan mas bieu di San Nicolas y e proyecto di revitalisacion ta contribui pa conserva e identidad historico di e area, mientras cu e casnan ta haya un apariencia nobo. Hassel a comparti tambe cu e trabounan di verf ta haya atencion positivo, hasta internacionalmente.

   El a menciona cu un influencer di Colombia, cu tin aproximadamente 1.2 miyon di hende cu ta sigui su contenido riba e rednan social, a saca potret di e casnan cu verf y a publica un mensahe positivo tocante e transformacion di Bernhardstraat.

   Glenda Thomasia, coordinador di Ministerio di Asunto General, a expresa su alegria y satisfaccion cu e cendemento di e luznan di Pasco. Pa Thomasia, e momento aki ta representa algo special pa comunidad, mirando cu ta di prome biaha cu Bernhardstraat ta haya e tipo di iluminacion aki. Thomasia tambe a expresa su agradecimento na N.V. Elmar, DOW y specialmente na tur e boluntarionan cu ta dedica nan tempo ta verf cas y drecha e area. El a destaca cu comunidad ta hopi contento cu e resultado y cu esaki ta representa cuminsamento di mas desaroyo positivo pa San Nicolas.

   Orguyoso di e transformacion: Durante e actividad, diferente boluntario y ciudadano di San Nicolas a comparti nan emocion y satisfaccion cu e cambionan cu ta tomando luga na Bernhardstraat. Un di e boluntarionan a destaca cu e cendemento di e luznan di Pasco ta representa e resultado di tur e tempo, sudor y esfuerso cu nan a dedica boluntariamente pa mira mehora den nan ciudad. E deseo di e boluntarionan ta pa e esfuersonan aki continua y pa mas proyectonan similar por wordo realisa den otro cayanan di San Nicolas.

   Otro ciudadano a destaca e importancia di e trabounan di verf e casnan, mirando nan como un contribucion na conservacion di e historia di San Nicolas. Segun su declaracion, e cambionan ta haci Bernhardstraat mas atractivo y por motiva hende for di otro barionan di Aruba pa bishita San Nicolas y aprecia su bunitesa. Tambe a expresa agradecimento na Prome Minister Mike Eman pa su compromiso cu e proyecto y pa e atencion cu e comunidad di San Nicolas ta ricibi. E trabounan di revitalisacion no solamente ta cambia e apariencia di e kaya, pero tambe ta contribui na reforsa e orguyo di e habitantenan pa nan propio ciudad.

   Revitalisacion ta sigui: E cendemento di e luznan di Pasco ta forma parti di un esfuerso mas amplio di Gobierno di Aruba pa revitalisa San Nicolas. Prome Minister Eman a destaca anteriormente cu revitalisacion no mester concentra solamente riba centro di Oranjestad, pero tambe den nos barionan y centro di San Nicolas mester beneficia di inversion y mehora di infrastructura. Den e contexto aki, Gobierno tin diferente proyecto den preparacion y desaroyo, incluyendo un MFA pa San Nicolas, renovacion di e area rond di De Vuyst y trabou di bashan asfalt riba diferente caya pariba di brug.

   Sin embargo, loke ta haci e proyecto di Bernhardstraat special ta e participacion directo di comunidad. E transformacion no ta solamente resultado di inversion publico, pero tambe di e ciudadanonan cu boluntariamente ta dedica nan tempo liber pa mira y haci mehora den e luga caminda nan mes ta biba. E esfuerso cu a cuminsa cu verf cas awor a crece den un iniciativa cu ta uni e habitantenan, boluntarionan, comercio y Gobierno rond di un meta comun. Cu e luznan di Pasco awor ta ilumina Bernhardstraat anochi e caya a haya un ambiente nobo. Pa e boluntarionan cu tur diasabra ta sigui pone man na obra, e momento aki ta representa un resultado visibel di nan compromiso. Pa comunidad di San Nicolas, e ta un señal cu e esfuersonan pa revitalisa nan ciudad ta sigui duna resultado.