FAVI riba Dia Internacional di Garoti
ORANJESTAD (AAN): Un garoti no ta solamente un instrumento pa mobilisa. E ta un señal di independencia, confiansa y libertad.
Pa un mucha cu limitacion di bista siña crusa caya cu siguridad ta un parti importante di su desaroyo. E garoti ta yuda e mucha orienta su mes, detecta obstaculo y move cu mas independencia. Pero pa e por participa di manera sigur den trafico nos tur tin un rol.
Pesey, na FAVI nan ta duna guia na mucha y adulto cu limitacion di bista pa nan por move cu mas confiansa y siguridad den nos comunidad. E muchanan tambe ta uza nan garoti pa mobilisa y ta importante cu nan compañeronan di klas, chauffeur, ciclista y peaton reconoce e garoti, respeta su funcion y comprende e señal cu e ta duna.
Ora di mira un mucha of adulto cu un garoti, pueblo mester reconoce cu e persona tin un limitacion di bista y por tin necesidad di mas espacio, tempo y atencion pa move cu siguridad.
E siman aki durante observacion Diahuebs di e Dia Internacional di Garoti FAVI ta pone enfasis riba concientizacion di nos muchanan. Nan tambe ta participa den actividad di crusa caya, siñando cu seguridad di trafico ta un responsabilidad comparti.
Pasobra patras di cada garoti tin un persona cu ta desea algo cu tur hende ta desea: libertad pa move, participa y forma parti di trafico. Un comunidad inclusivo ta un comunidad unda tur hende por move cu siguridad y libertad.
{gallery}Garoti ta senjal di independencia, confiansa, y libertad{/gallery}
