Prome Minister Mike Eman celebra 64 aña di Independencia di Jamaica

ORANJESTAD (AAN): Prome Minister Mike Eman a participa den celebracion oficial di 64 aña di Independencia di Jamaica,

un ocasion cu a reuni comunidad Jamaiquino na Aruba, e representantenan di Gobierno y Parlamento, Cuerpo Consular, e lidernan spiritual y otro invitado pa celebra historia, cultura y contribucion di pueblo Jamaiquino na Aruba. E ceremonia a inclui hisamento di bandera di Jamaica y Aruba, palabra di bonbin di Consul Honorario di Jamaica Donald “Don” Taylor, un discurso di Vice-presidente di Parlamento Muzannin Wever y un mensahe di Prome Minister di Jamaica Andrew Holness. Prome Minister Mike Eman tambe a dirigi e comunidad presente, mientras cu e programa a continua cu e presentacionnan cultural, un video historico relaciona cu emancipacion y un poema dedica na independencia.

Den su discurso, Prome Minister Eman a reflexiona riba e significado di independencia y riba e fortalesa di e generacionnan cu a contribui pa Jamaica por determina su propio futuro. Segun Prome Minister, independencia ta recorda nos di e lidernan fuerte y di un comunidad cu a compronde cu tanto oportunidad como responsabilidad pa guia futuro di nan pais ta den nan propio man. El a indica cu Aruba tambe ta beneficia di e balornan, determinacion y fortalesa cu comunidad Jamaicano a trece cu ne na nos isla. E contribucion di Jamaiconan na desaroyo di Aruba, segun Prome Minister, ta forma parti di e progreso cu nos pais a conoce durante añanan.

Un momento special durante e celebracion tabata reconocimento di Sra. Cazalet Dennis, kende ta biba mas cu 40 aña na Aruba y a wordo presenta durante e ceremonia como e residente Jamaiquino di mas edad na Aruba. Prome Minister a destaca su trayectoria como ehempel di hopi persona cu a bin Aruba, a traha duro y a dedica nan energia tanto na bienestar di nan famia como na progreso di e pais cu a bira nan hogar.  “Nos ta celebra e esfuerso hunto cu nos tur ta haciendo pa crea un nacion miho pa tur hende cu ta biba na Aruba,” Prome Minister Eman a subraya den su mensahe.

Un parti importante di su discurso a concentra riba e necesidad pa progreso economico di Aruba yega realmente cerca tur hende. El a observa cu Aruba tin cifranan economico y turistico positivo, pero cu ainda tin trabou pa haci pa prosperidad por sinti den cada cas, cada caya y cada bario. Prome Minister a señala cu ora Gobierno y comunidad papia di crecimiento y prosperidad, e meta no por ta solamente tin bon cifra. E progreso mester refleha den calidad di bida di e hendenan cu diariamente ta contribui na desaroyo di Aruba.

Den e sentido aki, el a haci un yamada pa tur hende cu contribui na prosperidad di Aruba tambe por comparti den e prosperidad ey. Segun Prome Minister Eman, esaki ta uno di e responsabilidadnan mas importante pa e generacion nobo di e lidernan politico y pa futuro di nos isla. Durante su mensahe, Prome Minister tambe a pone enfasis riba unidad y sentido comunitario, recordando cu Aruba ta un sociedad cu durante e generacionnan a wordo construi pa hende cu a nace aki y hende cu a scoge Aruba como nan hogar. Pa ilustra esaki, el a comparti un recuerdo di un conferencia anterior na Aruba cu un lider spiritual, unda un gran parti di e publico finalmente a indica cu nan no a nace na Aruba.

E mensahe cu a sigui tabata cu si nan ta na Aruba, nan presencia aki tin un proposito y nan ta parti di e comunidad. Prome Minister Eman a conecta e recuerdo ey cu comunidad Jamaicano y a expresa cu nan presencia y contribucion na Aruba mester wordo mira den e mesun luz: como parti integral di construccion di nos pais. El a gradici comunidad Jamaiquino pa nan aporte na Aruba y a expresa cu Gobierno y pueblo di Aruba ta celebra hunto cu nan no solamente independencia di Jamaica, sino tambe e historia di esfuerso y progreso cu Jamaiquino na Aruba a yuda construi.

Prome Minister a termina su discurso cu un yamada pa sigui construi Aruba den unidad, amor y responsabilidad comparti, guia pa fe y balornan cu ta fortalece comunidad.

E celebracion a continua cu diferente expresion cultural y historico y cu reconocimento di miembronan di comunidad, den un ambiente dedica na 64 aniversario di Independencia di Jamaica y na e lasonan fuerte cu comunidad Jamaiquino a forma cu Aruba durante e añanan.