Prome Minister Mike Eman a subi bus publico pa combersa directamente cu e trahadornan

ORANJESTAD (AAN): Den cuadro di su acercamento continuo cu comunidad, Prome Minister Mike Eman a subi bus publico

mainta tempran pa combersa directamente cu e trahadornan cu diariamente ta depende di transporte publico pa yega na nan trabou. E iniciativa a brinda e Prome Minister oportunidad pa scucha personalmente e preocupacionnan di e empleadonan di diferente sector, particularmente tocante costo di bida y e necesidad di un salario cu ta permiti nan cubri nan gastonan basico.

Prome Minister Eman a splica cu durante su bishitanan regular den nos barionan di Aruba, e tin oportunidad di combersa cu ciudadanonan di diferente edad y situacion social. Sin embargo, e bishita di awe mainta tabata dirigi specialmente riba e trahadonan cu ta sali for di cas tempran pa cumpli cu nan responsabilidadnan laboral.Durante e combersacionnan den bus, e tema di salario minimo a surgi repetidamente. Segun e Prome Minister, hopi trahado ta indica cu, apesar di nan esfuerso y dedicacion, e salario cu nan ta ricibi no ta suficiente pa cubri tur e gasto di nan hogar.“Placa simplemente no ta yega,” tabata un di e preocupacionnan cu e Prome Minister a tende durante e recorido.

Un realidad cu ta cuminsa hopi tempran

E acercamento a pone enfasis tambe riba e sacrificionan personal y den famia cu hopi empleado ta haci diariamente.Prome Minister Eman a referi na e realidad di mayornan cu mester lanta desde cuat’or di mainta pa prepara nan yiunan, percura pa nan desayuno y organisa e hogar, prome cu nan sali pa subi bus pa bay trabou. Den algun caso, specialmente den sector hotelero, nan ta yega bek cas te den oranan di anochi.

Durante e combersacionnan, diferente persona a comparti e dificultad pa paga huur, gastonan basico y transporte. Pa algun trahado, e posibilidad di cumpra un auto of mehora nan situacion di vivienda ta bira cada bes mas dificil.Segun Prome Minister Eman, e realidadnan aki ta mustra cu e discusion tocante salario minimo no por limita solamente na cifra y calculacion economico, sino cu mester tene cuenta tambe cu e calidad di bida di e hendenan cu diariamente ta contribui na funcionamiento di Aruba.

Reconocemento pa nos hendenan cu ta sostene nos economia

Prome Minister Eman a destaca e contribucion esencial di trahadonan den diferente sector economico, particularmente esnan cu ta directamente relaciona cu turismo, comercio y servicio.

El a menciona e empleadonan cu ta prepara cambernan di hotel, carga maleta, mantene e facilidadnan limpi, atende cliente y brinda servicio diariamente. Segun e Prome Minister, e exito di un empresa ta depende tambe di e dedicacion y calidad di servicio di su empleadonan.Sin e trahadonan aki, e actividad economico y e servicio cu Aruba ta ofrece no por funciona na e nivel cu nos ta conoce awe.Pa e Prome Minister, ta importante cu e contribucion aki haya su debido reconocemento, no solamente den palabra, sino tambe den cifra cu e empleadonan ta ricibi.

Dialogo y responsabilidad den buskeda di solucion

E bishita ta tuma luga den un momento cu e tema di aumento di salario minimo ta ocupa un luga importante den e debate publico y gubernamental.Prome Minister Eman ta mantene su conviccion cu mehoracion di e condicionnan di trahadonan mester keda un prioridad. Na mes momento, e proceso ta rekeri dialogo y analisis cuidadoso, teniendo cuenta cu e interesnan di trahadonan, empresanan y e stabilidad economico di Aruba.

E Prome Minister a indica cu e lo sigui combersa cu e hendenan cu diariamente ta enfrenta e desafionan aki, pa asina percura cu nan preocupacionnan y necesidadnan ta haya un luga den e consideracionnan cu ta precede decisionnan gubernamental.El a reafirma cu e esfuerso pa mehora e situacion di nos trahadornan lo continua, cu e aspiracion pa yega na solucion cu ta reconoce nan contribucion y brinda nan mas perspectiva pa futuro.

Cu e bishita di awe mainta, Prome Minister Eman a pone e experiencia diario di e trahado Arubano na centro di e discusion: un persona cu ta traha cu dedicacion, cinco of seis dia pa siman, mester por conta cu un pago cu ta haci un bida digno mas alcansabel pa su famia.