Cu un yamada pa un Reino mas fuerte y un futuro di cooperacion
ORANJESTAD (AAN): Prome Minister di Aruba, Mike Eman, a participa pa ultimo biaha na Rijksministerraad (RMR) na Den Haag, caminda el a haci un discurso di despedida cu a concentra riba su añanan di cooperacion den Reino Hulandes, e relacion entre Aruba y Hulanda y su vision pa futuro. Presente durante e reunion tabata e Ministronan Plenipotenciario di Aruba, Corsou y St. Maarten, como tambe otro miembronan di Gabinete Jetten.
E momento di despedida a duna Eman oportunidad pa reflexiona riba su contribucion durante diferente periodo como Prome Minister di Aruba. Den su discurso el a destaca no solamente e resultadonan logra, sino principalmente e importancia di sigui fortalece e lasonan entre e paisnan di Reino, creando oportunidadnan nobo cu ta beneficia tur su habitantenan.
Durante su añanan como Prome Minister, Eman a traha cu cuater Prome Minister di Hulanda: Jan Peter Balkenende, Mark Rutte, Dick Schoof y Rob Jetten. Segun Eman, cada un di e periodonan aki tabatin su propio retonan, pero un conviccion a keda central den su trabou: e relacionnan den Reino mester bay mas leu cu solamente e lasonan historico y constitucional. Nan mester traduci den cooperacion concreto cu ta produci resultado pa e paisnan y nan comunidadnan.
Regreso di KLM na Aruba como ehempel di cooperacion: Un di e momentonan cu Eman a recorda cu orguyo ta regreso di KLM na Aruba na februari 2010. Na final di 2009, poco despues cu el a bira Prome Minister, Aruba tabata enfrenta e situacion cu KLM a termina su servicio regular di vuelo pa nos isla. Pa un pais cu ta depende grandemente di su conexionnan internacional, esaki tabata un reves importante. Cu sosten y envolvimento di Prome Minister Jan Peter Balkenende, Minister Camiel Eurlings y e mandatario di KLM Peter Hartman, a logra trece e compania di aviacion bek Aruba.
Segun Eman, e resultado aki tabata mucho mas cu regreso di un compania di aviacion. E tabata un ehempel concreto di loke por logra ora gobierno, empresanan y institucionnan den Reino ta asumi responsabilidad y ta traha hunto. E cooperacion aki a forma base pa diferente otro iniciativa durante e añanan siguiente. Entre otro, Eman a menciona e relacion cu Schiphol, establecimiento di TNO na Aruba y cooperacion cu Rietveld Academie, e scol di navegacion di Rotterdam, Havenbedrijf Amsterdam, Philips y Qredits. Tur e iniciativanan aki tabata parti di un vision mas amplio, den cual Aruba no ta wordo mira solamente como un isla chikito na distancia di Hulanda, sino como un socio valioso cu tambe tin algo importante pa ofrece.
Eman a destaca cu posicion geografico di Aruba, su caracter multilingual y su relacionnan cu e region Caribe y Latino America ta crea oportunidad pa contribui na desaroyo di Reino Hulandes.
Mirando pa futuro, Eman a destaca e cooperacion cu Wageningen University & Research (WUR) como un ehempel di e direccion nobo cu Reino por sigui. Den e ultimo aña y mey, Aruba a bolbe duna atencion na e vision di un cooperacion mas structural cu Hulanda, basa riba beneficio mutuo. Un di e prome pasonan concreto ta e trabou cu Wageningen University & Research pa establece un presencia structural na Aruba y desaroya un centro di conocimento.
E centro aki por concentra riba varios tema cu ta di importancia fundamental pa futuro di Aruba, manera siguridad di alimento, adaptacion na cambio di clima, biodiversidad, maneho di awa y desaroyo sostenibel. Eman a explica cu e temanan aki no ta relevante solamente pa Aruba, sino tambe pa Hulanda, e region Caribe y otro partinan di mundo. Den su vision, futuro di Reino mester ta basa riba un cooperacion unda cada pais ta contribui cu su propio fortalesa. En bes di concentra solamente riba e problemanan y reparticion di e responsabilidadnan, e paisnan mester busca oportunidad pa crea balor nobo hunto.
Eman a referi tambe na necesidad di busca un "new reason why" pa Reino Hulandes. Cu esaki el a haci referencia na un vision renoba, cu ta duna un nificacion nobo na e relacion entre e paisnan, basa no solamente riba historia comun, sino principalmente riba loke nan por construi hunto den futuro. Aunke Eman no lo por sigui dirigi e proyectonan aki den su funcion actual, el a expresa su deseo di sigui contribui na e vision aki den otro capacidad.
Un despedida cu gratitud pa varios aña di cooperacion: Durante su discurso den e Rijksministerraad, Eman a dedica palabranan di gratitud na e diferente Prome Ministernan Hulandes, minister, secretario di estado, mandatario y funcionario publico cu el a traha cu nan durante e ultimo añanan. El a reconoce cu no tur momento di cooperacion tabata facil y cu tabatin tambe diferencianan di opinion.
Sinembargo, segun Eman, precisamente e experiencianan aki a resalta importancia di respet mutuo, confiansa y disposicion pa realmente compronde otro. Eman a enfatisa cu, aunke e institucionnan, tratadonan y structuranan constitucional ta importante, na final ta e hendenan cu ta haci cooperacion posibel. Personanan cu ta dispuesto pa wak mas leu cu nan propio responsabilidad, habri porta y compromete nan mes pa logra resultado concreto.
Cinco generacion di famia Eman den servicio di Aruba: E discurso di despedida tabatin tambe un aspecto personal y historico. Eman a expresa cu su salida como Prome Minister ta marca final di un capitulo particular den historia di su famia, despues di cinco generacion di famia Eman cu, cada un na su manera, a contribui politicamente na Aruba y na su posicion den Reino Hulandes. Durante e ultimo seis añanan, Eman a dedica tempo na investigacion di historia di su bisabuelo, Cornelis Hendrik Eman, kende na 1899 a ser eligi pa prome biaha como landraad.
Den su investigacion, Eman a descubri con experencia personal dificil, den un periodo di pobresa y sequia na Aruba, a contribui na forma e sentido di responsabilidad di su bisabuelo pa comunidad. Segun Eman, den e cartanan cu su bisabuelo a laga atras, e a encontra constantemente e mesun principionan: atencion pa otro, cuido pa esnan vulnerabel y amor pa Aruba y su habitantenan. E investigacion aki a resulta den su buki Voorvechter – Cornelis Hendrik Eman en het ontwaken van Aruba, cu lo sali na benta final di november 2026. Eman a indica cu e legado mas importante di e cinco generacion no ta e funcionnan politico cu nan a ocupa, sino e responsabilidad cu nan a asumi pa sirbi comunidad.
E concepto di bon comun lo keda central den su compromiso: Un di e mensahenan principal di su discurso tabata cu su despedida di gobierno no ta nifica final di su compromiso cu sociedad. Eman a anuncia su intencion di sigui dedica su mes na e concepto di Common Good, of bon comun, cu durante e ultimo añanan a bira cada bes mas importante den su vision politico y personal.
El a reflexiona riba e realidad cu, a pesar di crecimento economico y aumento di prosperidad, tin hopi hende cu no ta sinti cu nan ta comparti suficientemente den e progreso aki. Tambe el a expresa preocupacion tocante e distancia cu ta creciendo entre gobierno y ciudadano, y entre e ciudadanonan mes.
Segun Eman, e situacion aki no por wordo soluciona solamente cu modelonan economico nobo, institucionnan of mas regla. Ta necesario pa sociedad bolbe haci e pregunta fundamental di pa kico progreso economico ta sirbi. Den su vision, crecimiento economico no mester ta un meta riba su mes. E mester contribui na dignidad humano, husticia social, solidaridad y bienestar di comunidad.
Eman a enfatisa cu e concepto di bon comun mester bolbe bira un compas pa e desicionnan cu gobierno y sociedad ta tuma. E principio aki ta relevante tambe pa Reino Hulandes. Segun Eman, e lasonan entre e paisnan no por depende solamente di un structura constitucional, sino mester basa riba un responsabilidad comparti pa bienestar di tur habitante y futuro di e generacionnan cu ta bin.
Na final di su discurso, Eman a expresa su gratitud pa e cooperacion, e confiansa y e amistad cu el a experimenta durante su añanan como Prome Minister. El a destaca cu su despedida di Rijksministerraad no ta cambia su conviccion cu e paisnan di Reino Hulandes por sigui construi un futuro mas fuerte hunto.
Den un di su palabranan final, Eman a declara. "Awe mi ta despedi di e mesa aki, pero no di mi conviccion cu hunto nos por construi un Reino mas fuerte."
Cu e mensahe aki, Eman a cera su ultimo participacion na Rijksministerraad, poniendo enfasis riba un Reino cu ta uni su paisnan, crea oportunidad nobo y cu su nificacion mas profundo ta refleha den bienestar di e hendenan cu ta forma parti di dje.
