Prome Minister Mike Eman a bishita galeria Etnia Nativa

ORANJESTAD (AAN): E siman aki Prome Minister mr. Mike Eman a realisa un bishita di cortesia na Etnia Nativa,

un galeria y museo dedica na arte Nativo Arubano. E galeria, situa den cas di e propietario mes, ta un tesoro cultural na Westpunt, Noord, unda bishitanten por aprecia arte cu ta carga e raiz y fundeshi di nos pueblo di un generacion pa otro.

   Propietario Anthony Croes y su esposa ta cuida y maneha e museo cu hopi dedicacion. Nan a habri nan porta pa publico pa expone nos historia, cultura, biodiversidad y plantacion nativo, loke por bira sostenibel si trata esakinan cu amor y cariño.

   Durante e bishita, Premier Eman a haya un recorido completo di e localidad, caminda por a admira obra di arte crea pa Sr. Anthony mes, inspira den historia arkeologico di Aruba y e identidad cultural di nos comunidad. E arte ta refleha e caracter fuerte di nos antepasadonan cu a logra enfrenta momentonan dificil den nos historia.

   Arte ta presente den tur skina di e galeria, for di piedra cu tabata uza pa mula maishi, te obhetonan pa warda awa. E creatividad y resistencia di nos pueblo ta evidente den tur detaye.

   Premier Eman a expresa cu e bishita tabata un inspiracion, mirando su responsabilidad actual como Minister di Cultura y Naturalesa. Etnia Nativa ta un ehempel di kico por logra ora ta combina historia, cultura y naturalesa den un solo espacio.

Sr. Anthony Croes, cu su pasion pa naturalesa y identidad Arubano, a cuminsa desde chikito como scout. Aki a nace e inspiracion pa defende y cultiva naturalesa y pa yuda e mas debil, un principio cu Sr. Croes a keda sigui den tur fase di su bida.

   Sr. Croes a comparti e historia breve di e tereno na Westpunt, caminda su galeria ta situa. Inicialmente un area bashi cu bista pa lama, awor e ta parti di un zona residencial. E cas mes ta construi pa ochenta porciento cu material recicla, den harmonia cu naturalesa.

  Durante e recorido, Prome Minister Eman a nota un cambio di temperatura ora drenta e hofi. E frescura natural cu e matanan ta brinda ta un ehempel concreto di kico e plan di reforestacion presenta pa gabinete AVP-Futuro por logra.

   Premier Eman a enfatisa riba e importancia di educa pueblo tocante e efectonan positivo di mata riba nos medioambiente. Ta importante pa siña unda, kico y dicon mester planta pa logra un balans sostenibel den naturalesa.