Prome Minister Mike Eman a atende e dia di monumento na San Nicolas

ORANJESTAD (AAN): Diadomingo mainta, Prome Minister mr. Mike Eman, a haci un bishita na Watertoren na San Nicolas,

den cuadro di e dia di "Open Monumentendag" organisa pa Stichting Monumentenfonds Aruba y Departamento di Cultura Aruba. Cu e compromiso pa cultura, Prome Minister Mike Eman a atende e dia di monumento aki pa duna apoyo na e importancia di preservacion di nos monumentonan.

            San Nicolas, como simbolo di nos herencia cultural, ta sirbi como podium ideal pa e evento, cu ta un invitacion pa duna balor na nos historia y proteha nos identidad nacional. Tabata hustamente durante Gabinete Eman I y II, bao liderato di Prome Minister Eman, cu a restora Watertoren na Oranjestad y na San Nicolas, pero tambe entre otro di Uncle Louis Store. 

            San Nicolas tin un historia impresionante den desaroyo di Aruba durante varios aña. Aruba su unico pilar economico tabata e industria di refineria cu a trece miles di trahado for di diferente isla y cultura den Caribe pa yuda construi Aruba y tur hunto a crea e San Nicolas vibrante y unico di awe. Prome Minister su presencia ta reforsa e mensahe cu un pais mester honra su pasado pa construi un futuro sostenibel. 

            Open Monumentendag a inicia na Watertoren San Nicolas cu un presentacion cultural dirigi pa John Freddy Montoya, acompaña pa Tutti Frutti. Durante e dia por a bishita Museo di Industria, Nicolaas Store, Uncle Louis Store, casnan historico y Misa Santa Teresita. Ademas tabatin varios tour cu guia, speurtocht, presentacionnan historico, tayer di arte, y un pop-up market. 

            E evento aki ta sirbi como plataforma pa riba nivel nacional, amplia participacion civico y involucra tur generacion den e dialogo riba proteccion di nos patrimonio. Ademas e ta un oportunidad pa famianan pasa tempo hunto y siña y aprecia nos herencia y patrimonio.