Milton Ponson di Rainbow Warriors...
ORANJESTAD (AAN): E nomber ta Bicicleta, pero na Aruba e ta mas conoci como ‘Bais’, mientras na Curaçao y Bonaire e ta conoci como ‘Baiskel’.
Milton Ponson di Rainbow Warrior Core Foundation na Aruba, reconociendo e singularidad, longevidad y versatilidad di e bicicleta, cu mas cu dos siglo di uso, y cu alavez ta constitui un medio di transporte sostenibel, simpel, economico, confiabel, limpi y ecologico cu ta contribui na un mihor medio ambiente y mehoracion di salud, Asamblea General di Nacionnan Uni na 2018 mediante Resolucion A/RES/72/272 a declara 3 di juni como Día Mundial di Bicicleta.
E dia aki ta encurasha stakeholders y personanan interesa pa enfatisa y avanza e uso di bicicleta como un medio pa promove desaroyo sostenibel, renforza educacion, incluyendo educacion fisico pa mucha y hoben, promove salud, preveni maleza, promove tolerancia, entendimento y respet mutuo, facilitando inclusion social y un cultura di paz.
E Asamblea General di Nacionnan Uni ta balora positivamente e organizacion di marcha di bicicleta pa fortalece salud fisico, mental y bienestar y desaroya asína un cultura di bicicleta den sociedad.
E uso di bicicleta: Actividad fisico di un intensidad modera, manera canamento, ciclismo of practica di deporte tin benificio grandi pa salud. Na tur edad e beneficionan di ser activo fisicamente ta mas grandi cu e posibel daño causa por ehempel door di accidente. door di bira mas activo durante e dia den forma relativamente simpel, hende lo por logra e nivelnan di actividad fisico recomenda facilmente.
Segun Organizacion Mundial di Salud (WHO), door di ofrece un infrastructura sigur pa actividadnan fisico, manera canamento y core bicicleta, ta e caminda pa alcanza un mayor equidad den materia di salud. Pa e sectornan urbano mas pober, na unda no por permiti economicamente tin un vehiculo propio, bay na pia of core bicicleta por converti den un forma di transporte, y na e mesun momento por reduci e riesgo di contrae maleza cardiovascular, accidente cerebrovascular, cierto tipo di cancer, diabetes y hasta morto.
Consecuentemente, transporte activo mehora (cana, uso di bicicleta y transporte publico) no solamente ta saludabel, e tambe ta ekitativo y ta mas efectivo pa loke ta gastonan di transporte.
Satisface e necesidadnan di ciclista y peaton ta sigui ta, por lo tanto, crucial pa soluciona problemanan di mobilidad di ciudadnan, pa mitiga e aumento di emision di gasnan cu ta causa e efecto invernadero debi na crecimento di e poblacion y pa mehora e calidad di aire y seguridad di trafico.
Ciclismo y desaroyo sostenibel: Dia Mundial di Bicicleta ta pone atencion riba e beneficionan di uza bicicleta, un medio di transporte simpel, economico, limpi y ambientalmente sostenibel. E bicicleta ta contribui na un aire mas limpi y menos congestion den trafico y ta haci educacion, cuido di salud y otro servicio social bira mas accesibel pa e partinan mas vulnerabel den e poblacion.
Un sistema di transporte sostenibel cu ta promove crecimento economico, ta reduci desigualdad y ta renforza e lucha contra cambio climatico y ta fundamental pa alcanza e Obhetivonan di Desaroyo Sostenibel (SDGs).
Segun e Global Action Plan on Physical Activity 2018-2030 di WHO actividadnan fisico tin benificio multiplicador pa salud, economia y sociedad y inverti den accionnan di maneho politico pa aumenta actividad fisico por contribui na logra cumpli cu e Obhetivonan di Desaroyo Sostenibel (SDGs).
Tin multiple manera directo y indirecto, mediante cual maneho cu ta promove actividad fisico a traves di canamento, ciclismo, deporte, recreacion activo y hungamento por sostene no menos cu 13 di e SDGs.
Na 2022 Asamblea General di Nacionnan Uni a adopta Resolucion A/RES/76/255, Integration of mainstream bicycling into public transportation systems for sustainable development.
E resolucion ta enfatisa e necesidad pa integra e bicicleta como medio di transporte saludabel, ecologico y contribuidor na SDGs den e sistema di transporte publico, na nivel urbano y rural, y den planificacion urbano, permitiendo un integracion di infrastructura pa ciclismo den e infrastructura resiliente di mobilidad en general.
Incorporando alavez e mehoracion di seguridad di trafico pa peaton y ciclista y promoviendo e uso di bicicleta como medio di transporte den comercio, turismo y ciclismo, como deporte y pa combati y reduci malezanan cronico no-contagioso (NCDs).
Situacion di infrastructura pa bicicleta na Aruba: Na Aruba Resolucion A/RES/76/255, esta “Integracion di ciclismo en general den sistema di transporte y mobilidad pa desaroyo sostenibel” ta delinea varios punto importante cu mester ser incorpora tanto den nos maneho pa transporte y mobilidad sostenibel, como planificacion urbano y rural y den salubridad y deporte.
Den e planificacion urbano y creacion di infrastructura pa transporte y mobilidad, particularmente Green Corridor Aruba y Watty Vos Boulevard insuficiente prioridad a ser duna na e infrastructura pa e bicicleta como medio di transporte y pa e peaton y menos ainda na e seguridad di trafico pa peaton y ciclista.
Companianan a lanta ta huur e-bikeboard, scooter y bicicleta (electrico) na turista como medio di transporte economico y sostenibel. Pero esaki ta un potencial peliger den trafico ya cu e infrastructura di transporte na Aruba no a ser diseña cu e uso di bicicleta (electrico) y ebikeboards y scooter electrico den mente.
Gobierno a anuncia un plan magno pa un transicion husto pa energia renovabel y sostenibel pa combati cambio climatico na final di e Caribbean Climate and Energy Conference 2023.
Pero pa loke ta ta transporte y mobilidad resiliente y sostenibel lo ta casi imposibel pa cumpli cu integracion di bicicleta (electrico), ebikeboards y scooter electrico den esaki.
Lo mester adapta ley y maneho pa permiti un uso mas amplio y sigur di bicicleta (electrico), ebikeboards y scooter electrico pa reduci emision di gasnan invernadero den trafico y duna aporte na ciclismo como deporte y como forma saludabel di ehercicio pa combati y reduci malesanan cronico no-contagioso.
