Prome Minister Mike Eman a anuncia proyectonan di renobacion di barionan.

ORANJESTAD (AAN): Durante Gabinete Mike Eman I y II tabata tin un concentracion historico riba renobacion di barionan rond Aruba

manera Yuwana Morto, Yara, De Vuyst, Madiki, Pos Chiquito y Bushiri. Lamentablemente e ultimo añanan no tabata tin atencion y e barionan a deteriora.

   Durante di e apertura oficial diamars anochi di e playground y cancha di futbol na Madiki, Prome Minister mr. Mike Eman a anuncia un era nobo pa e barionan social den cual pronto lo inicia cu e trabaonan di revitalisacion. Premier Eman a anuncia cu pronto lo inicia cu trabaonan den algun bario di casnan social di FCCA. Ta trata aki di e barionan di De Vuyst, Mabon y Bushiri.

   Na Bushiri, hunto cu FCCA y cu ideanan di e habitantenan, na comienso di 2026 lo inicia cu trabaonan di renobacion y verfmento di tur e casnan, lo construi voetpad den e bario, lo planta un cantidad di mata, lo crea un parke di recreaccion pa e muchanan y lo instala luz den e bario pa aumenta e siguridad pa e propio habitantenan.

   Na Mabon tambe lo inicia cu trabaonan di renobacion completo di e casnan di piso. Tambe lo renoba e voetpad riba peticion di e propio habitantenan cu ta uza esaki frecuentemente. Lo crea un parke na unda e habitantenan por recrea y bin hunto como comunidad.

   De Vuyst ta un di e barionan cu den pasado bao liderato di Prome Minister Eman, a worde  renoba completamente y cu hopi dolor Prome Minister Eman a mira con tur su esfuerso a bay perdi completamente durante di e ultimo gobierno. E bario di De Vuyst a bira un ghost-town y practicamente no por papia di un comunidad mas. Mescos cu Bushiri y Mabon, De Vuyst lo bolbe rebiba cu e maneho di e gobierno aki. Lo revitalisa De Vuyst den su totalidad y pronto lo por forma e comunidad cu tanto e habitantenan ta anhela.

   E maneho di Gabinete AVP-Futuro ta basa riba un acercamento holistico den cual ta tene cuenta cu hopi otro factor cu tin un impacto riba un hende su bida. Den pasado, mayoria bez, a construi casnan social y ta lubida riba e diferente aspectonan cu hunto ta crea un hogar, y no solamente un dak riba cabes. Na momento cu un habitante di un bario tin espacio pa recrea, tin espacio pa forma nan comunidad pa medio di actividadnan social, ta organiza nan mes pa mantene nan bario limpi y bunita, na final di dia e ta crea  habitantenan cu ta biba den harmonia cu otro y ta cuida locual ta di nan. E propio habitantenan lo carga nan bario y stimula habitonan positivo na beneficio di nan bario. E ta crea un sentido di orguyo pa ta parti di e bario y ta crea comunidadnan solido y uni y asina reduci e dependencia di cualkier gobierno pa por mantene e barionan.