Tocante cortamento den gastonan - ORANJESTAD (AAN) — Minister Presidente demisionario y alavez formador di e proximo Gabinete: Wever-Croes 2, a haya preguntanan di prensa na final di su disertacion
den e conferencia di prensa di Diabierna atardi, despues cu como Formador a reuni cu e prome gremionan riba tereno di salud publico.
E dignatario a wordo puntra con e lo haci pa corta mas den e diferente sectornan na unda tin exigencia pa corta door di e condicionnan cu Hulanda a stipula den e Landspakket.
E pregunta ta den sentido cu e diferente sectornan unda tin cu bay corta den presupuesto ta sinti cu nan no por entrega ni 0.1% mas.
E mandatario a contesta cu no tin di haber solamente, cu cualkier sector unda tin cu corta ta haci dolor, pasobra esey no ta e hecho. E hecho ta cu e exigencia di Hulanda ta cu 5 miyon florin mester wordo corta tur luna, den cuido di salud.
“Nos a bisa OK, nos ta bay sake for di otro caminda, y nan a bisa no, di cuido di salud e tin cu bin, y esey ta hacie asina complica. Pero nos a bisa for di comienzo di aña cu nos no por corta 5 miyon. Nos a corta lo minimo cu nos por a corta durante e aña aki y e no ta yega 60 miyon pa aña, tampoco” Formador Wever-Croes a comenta.
Manera ta conoci CAft tabata na Aruba ultimamente, y un di e condicionnan cu nan a pone riba papel ta cu dentro di algun siman, gobierno di Aruba mester duna un relato, con ta bay yega na 60 miyon y e dignatario no ta kere nos ta bay yega na 60. “Pero nos por mustra kico si nos a haci, pasobra loke nos a corta ta duna un tipo di besparing”, el a agrega.
El a subraya cu e lo bolbe cu tur e informacion cu a haya diabierna atrobe, y bolbe haci casi un plegaria si por yame asina, e ruego (of implora) pa nan kita e presion aki for di Aruba, pasobra e no ta husto.
“ Ora cu mi a tende cu nos docternan ta bay for di Aruba pa bay traha na Bonaire, pasobra Bonaire no mester a corta nan gasto di cuido, Bonaire a haya bonus pa esnan cu ta traha den sector medico, y docternan di cas a bisa nos cu na Bonaire e salario ta dos bez y mey mas cu na Aruba, y mi ta haya hopi mas inhusto cu e peso a wordo poni riba Aruba cu tin cu corta, anto na otro camindanan no. E ta bay bira un combinacion ora cu nos tin cu haci e rapport aki pa CAft, di logra kico si nos a logra corta y bisa ‘te aki nos ta yega’, nos no por bay mas leu”, Formador Evelyn Wever-Croes a remarca.
