Proceso diferente di formacion aplaudi den tur sector di Aruba - *Aruba mester recupera su autonomia financiero den competencia mundial - *Prome cu 2017 Arubianonan a haci debe grandi cu a bira peso den Covid-19
ORANJESTAD(AAN)--Tema central di e investigacionnan cu a tene DIARIO ocupa den fin di siman tabata, e formacion unico di un Gobierno nobo y cu ta duna contenido completo na e esencia di un Gobierno di Pueblo, manera democracia directamente ta exigi.
Formador Evelyn Wever-Croes no solamente a scucha representantenan di sectornan den comunidad, pero duna periodismo cu mester informa Pueblo e oportunidad, pa scucha loke e sectornan aki a trece dilanti y cu mester haya espacio den e maneho di e Gobierno cu ta den formacion.
Esaki ta nifica cu no solamente e sectornan a haya oportunidad pa forma parti di e programa di gobernacion, pero cu tambe Formador Wever-Croes a entrega prensa y asina Pueblo un forma pa por vigila si Gobierno ta tene su mes na e loke sectornan den comunidad a trece dilanti.
Expertonan a indica cu formacion di Gobierno a haya un base solido debi na e transparencia cu ta wordo aplica y den cual e sentido di participacion directo ta resalta.
Nan ta considera e acercamento actual como sumamente importante debi na e hecho cu Aruba ta drenta un temporada di gobernacion, cu ta dicidi pa futuro di Aruba y hasta pa e relacion entre Aruba y Reino.
E maneho aki a fracasa for di 2010, ora cu Gobierno Mike Eman mes a anuncia na Pueblo cu no por sigui baha e BBO pasobra resultado no tabata loke nan a spera.
Expertonan ta splica cu e efecto di Citgo tabata grandi, pasobra Gobierno Mike Eman a priminti cu Citgo lo trece un crecemento economico enorme, di 12.5 porciento, loke a haci cu cantidad di Arubiano y empresa Arubana a bay haci debe.
Na 2018 Citgo a pasa pa historia practicamente, pero cantidad di Arubiano y empresa Arubano a keda cu debe pa paga mientras e pais Aruba mester a subi belasting pa por a paga tur debe cu Gobierno Wever-Croes a hereda di Gobierno Mike Eman.
Informantenan ta uza cifranan di Banco Central pa indica e problema serio cu Pandemia Covid-19 a bira pa Aruba, cu a mira con mas cu 60 porciento di famianan a keda sin entrada.
Mita di poblacion di Aruba a keda cu un entrada bou di e suma cu un famia mester pa biba.
A yega e momento cu uno den cada cuatro famia, tabata depende di asistencia di Gobierno pa nan por a biba.
Mientrastanto informacionnan cu DIARIO tin di instancianan cu ta atende cu economia mundial, ta indica cu paisnan mester trata di mantene stabilidad, busca crecemento economico y evita peso fiscal demasiado halto pa asina yega na recuperacion.
E acuerdo alcansa cu Hulanda ta wordo considera di gran balor sigur pa e ciudadano, cu mester beneficia di e maneho cu politiconan ta hiba.
Expertonan a mustra DIARIO cu tur cifra ta indica cu Aruba a cuminsa conoce recuperacion. Sinembargo, maneho di e gobierno den formacion lo ta decisivo pa futuro di Aruba.
E maneho di Gobierno Wever-Croes 2 mester ta firme y solido y a base di compromiso, transparencia y contacto directo cu Pueblo, pa hunto crea e Aruba cu lo dicidi pa condicionnan di bida di e Arubiano den futuro.
Aruba mester tene e competencia di cantidad di otro pais na consideracion y sigui fortifica su posicion pa atrae inversionista y trabou.
“Nos ta drenta e temporada di gobernacion mas importante cu Aruba a conoce for di Status Aparte pasobra si Aruba faya den e proximo temporada di gobernacion, Reino lo mester interveni directamente hasta si e Acuerdo cu Reino di 2020 no tabata existi,” informantenan a indica.
