Unda Gerencia di WEB lo kier cumpra gas si el a bisa cu e ta atende cu Eagle? - *Acuerdonan internacional a ratifica importancia awa den bida di hende - *Den calamidad di COVID-19 Arubianonan mester di alivio di prijs di awa
ORANJESTAD(AAN)—Ta un abuso contra democracia, cu porta ta wordo cera pa un Gobierno di un pais yega na un acuerdo cu un compania cu por trece un alivio social y habri un porta di economia.
Na diferente ocasion, DIARIO a cuestiona e asunto di Companianan di Estado, manera WEB tambe a bira. E companianan aki a wordo introduci hustamente pa bienestar di e Pueblo y di e pais wordo sirbi.
E siman aki lo tin un reunion durante cual Gerencia di WEB mester responsabilisa su mes pa e maneho cu e ta hiba y cu por termina den retiro di dos miembro di Gerencia.
DIARIO a tuma nota y a publica e base di tur discusion y no ta expresa su mes riba loke mester wordo discuti y den cual gerencia di WEB mester atende cu Utilities.
Un posicion firme DIARIO ta mantene enfrente e hecho cu Gobierno Wever-Croes a logra yega na un entendemento basico cu Eagle LNG y cu te awe Aruba no tin siguransa cu e proyecto aki por haci su entrada na Aruba y asina trece alivio y mehora e posicion di competencia di Aruba enfrente mas inversionista cu por yuda mehora e condicionnan di bida di e Arubiano.
Kico ta e berdad di loke ta pasa cu prijs di awa na e momentonan aki?
Prijs di awa na Aruba ta depende di tur gasto envolvi. E ta depende di e cantidad di placa cu ta paga na salarionan y e ta depende di e prijs di combustibel cu mester paga pa por produci awa y coriente.
Con importante awa ta den bida di hende, ta bini dilanti den e puntonan cu Nacionnan Uni a presenta y cu mester wordo atende dor di tur pais pa asina na 2030 sigura un mundo aceptabel pa gran parti di e poblacion mundial.
Pa Aruba e exigencia di Nacionnan Uni ta mucho mas facil cu pa paisnan cu no conoce ningun desaroyo. Aruba pa hopi tempo conoce un planta di awa y electricidad.
WEB ta propiedad di Pueblo di Aruba cu ta paga pa tur gasto di WEB, cu mester sirbi bienestar di Pueblo.
Ta increibel cu Aruba a haya un oportunidad unico pa baha e prijs di awa y coriente y esaki no por sosode pasobra un gerencia di un compania no ta atende cu e asunto manera mester ta.
Gerencia di WEB for di momento cu Eagle LNG, un compania Mericano reconoce y cu mester atende cu Leynan Mericano pa e atende cu Aruba tambe a bati na porta, a posicion su mes na un forma cu nos a critica.
Finalmente Gerencia di WEB a bisa cu e no ta atende mas cu otro companianan y cu e ta bay sinta na mesa cu Eagle LNG, cu no solamente kier bin bende gas como combustibel mas barata cu Aruba, pero cu kier trece un negoshi pa Aruba.
Pues Eagle LNG por yuda baha e prijs di awa na Aruba, cu a inverti ya den ekipo pa atende cu gas na WEB.
Si WEB tin prueba cu e compania Eagle LNG no ta bon pa Aruba, pakico e no a duna Gobierno of Parlamento e informacion aki? No ta Aruba ta paga salario di Gerencia di WEB?
WEB no ta na haltura cu na otro islanan tur intento ta wordo haci pa atrae companianan di negoshi di gas pa asina Caribe tambe beneficia?
Awe un gran parti di Pueblo di Aruba ta biba den dolor social pa motibo di e crisis financiero cu a wordo hereda na 2017 pero tambe pa motibo di Covid-19.
Pakico Eagle LNG ainda mester spera? Gasunie tin un miho solucion? E pipa di gas di Nicolas Maduro tabata mas atractivo?
Democracia ta yora pa loke ta pasa na Aruba, cu un dia a introduci companianan di estado pa yuda Pueblo di e pais.
Pueblo di Aruba mester ricibi un contesta satisfactorio y Parlamento mester cuminsa tuma accion pa Pueblo ta miho na altura kico ta pasa den companianan, cu mester sirbi Pueblo como propiedad di Pueblo cu ta paga bon placa pa maneha su propiedadnan.
