ORANJESTAD (AAN): Diamars mainta, a tuma luga un conferencia di prensa, en conexion cu e pasantia cu 9 alumno di EPI a haya di e hotel renombra Iberostar na Mexico.
Prome Minister Evelyn Wever-Croes a indica cu e oportunidad aki ta uno di gran balor pa nos studiantenan, mirando cu nan lo adkiri den e sgiuente 8 simannan, hopi experiencia den e sector hotelero.
Cu un conocemento amplio di e trabou di hotel, e hobennan aki, unabes nan caba nan estudio, lo por aplica pa puestonan halto den cualkier hotel aki na Aruba y rond mundo.
Prome Minister ta gradici Minister di Labor Glenbert Croes y Minister di Enseñansa Endy Croes, pa semper a traha den bienestar di nos hobennan, buscando oportunidadnan pa yuda nan yega na un bon trabou den futuro.
Cu e oportunidad aki, por confirma cu nan dedicacion y esfuerso a logra resultadonan positivo, pa loke ta educacion di nos hobennan y e oportunidad pa nan drenta e mercado laboral cu mas experiencia.
Pa varios luna e mandatarionan a traha riba e proyecto aki, asercando no solamente gerencia di Iberostar, sino e propio doño di e hotel sr Miguel Fluxa Rossello. Señor Fluxa Rossello na su turno a aserca EPI, logrando asina yega na un cooperacion mutuo pa cu e oportunidad di un pasantia na Iberostar Mexico, pa 9 alumno di EPI.
"Mi ta sumamente contento y enthusiasma pa wak con nos hobennan, aceptando e reto aki, ta lucha pa tin un miho futuro. E ta nos responsabilidad como gobernante di pais Aruba, pa inverti y busca oportunidadnan den enseñansa, creando asina futuro profesionalnan. Pa cu esaki mi ta hopi agradeci na Minister Glenbert Croes y Minister Endy Croes pa nan lucha incansabel pa loke ta educacion di nos hobennan pa asina nan por drenta e mercado laboral. Tambe, mi ta gradici EPI pa e bon trabou di educa nos muchanan, y e cadena hotelero Iberostar pa e confiansa deposita den nos hobennan, brindando nan e oportunidad pa un miho futuro" Prome Minister a expresa.
