Alarma cu DIARIO a bati hopi tempo pasa ta resona den naturalesa
- Aruba mester profundisa den e menasa creciente na su costa
- Cantidad halto di derame di petroleo na 2022 dilanti Aruba
ORANJESTAD (AAN)- Pa hopi tempo hende a ignora e desastre cu contaminacion di naturalesa por provica pa paisnan y nan economia.
Awor cu naturalesa a entrega prueba kico e por haci den desaroyonan cu ta resultado di cambio di clima, interes pa medio ambiente tambe ta crece.
Uno di e peligernan mas grandi cu Aruba ta confronta di parti di Nicolas Maduro, no ta un invasion di ehercito manera su palabranan a haci kere cu e ta capaz di organisa den porta di Aruba.
Informacion urgente cu DIARIO a ricibi di expertonan riba nan tereno, ta papia di e peliger creciente directo pa Aruba, cu ta keda den porta di Venezuela.
“Pa por analisa e situacion serio cu ta wordo produci y ta crece dilanti Aruba, mester cuminsa atende cu e situacion cu ta wordo crea dilanti porta di Aruba,” ta loke a urgi na e investigacionnan necesario pa por presenta e analisis di awe na Pueblo di Aruba.
Cu mundo ta na careda pa tanto desaroyo negativo, ta un hecho. Pero awor mundo ta realisa tambe pakico expertonan pa tanto tempo ta adverti cu e negligencia di mundo pa su naturalesa, awe ta resulta den peliger pa hende por tin cuminda pa e come y hasta basta rosea den un calor destructor.
Aruba sigur mester cuminsa atende cu e forma cu Nicolas Maduro ta pone economia di Aruba na peliger manera for di fin di 2022 DIARIO a adverti y a confirma na entrada di 2023 ora ya region di Caribe a mira kico ta e desastre cu derame di petroleo ta causa.
E maneho cu e Gobierno socialista di Nicolas Maduro ta sigui, ta uno di gana placa cu e ta kita despues for di boca di Pueblo directamente pero tambe cu e ta kita for di futuro generacionnan di Venezuela pero tambe di paisnan den Caribe y sigur Aruba.
Uno di e peligernan mas grandi cu Aruba ta confronta como produccion di Nicolas Maduro ta keda contaminacion di petroleo sigur awor cu mundialmente atrobe expertonan internacional ta bati alarma pa e realidad di contaminacion di naturalesa na Venezuela, costa di Venezuela y laman di Caribe.
Ta wordo mustra riba e realidad cu e problema mas serio ta na Zulia y Estado Falcon cu ta den porta di Aruba.
E plan Comunista estrategico cu ta base di gobernacion di Nicolas Maduro, no tin lugar pa bienestar di hende ni pais pero ta solamente dirigi riba creacion di placa bruto pa estado, cu ta mas preocupa cu e bienestar di dictadornan manera Maduro cu riba e bienestar di hende y mundo.
Bienestar directo sigur di Aruba ta na peliger creciente den un situacion mundial cu ta expone continuamente e resultado di destruccion di naturalesa, pues tambe clima y tur loke ta sostene bienestar di hende directamente.
E siman aki atrobe na plataforma internacional, atencion ta wordo pidi pa loke ta pasa cu Lago di Maracaibo como resultado di e maneho abusivo di produccion di petroleo di Nicolas Maduro.
E futuro di Lago di Maracaibo cu ta conduci directamente pa Laman Caribe, ta na discusion pa motibo di poluacion.
Kico ta e futuro di piscadornan, di bienestar di Pueblo di Aruba den e situacion actual?
Te awor mundo no ta mira nada di e cambio cu Maduro a priminti ora sigur e desastre causa pa un tankero a duna prueba con petroleo por destrui naturalesa manera a socede cu costa di e pais.
Economia di Aruba ta na peliger manera informacionnan cu nos a copila, ta duna prueba directamente.
Expertonan ta reclama cu Reino Hulandes mester atende cu e problema serio aki.
Aruba a bira victima di Nicolas Maduro na diferente forma te awe. Pero e peliger mas grandi ta keda e Lago di Maracaibo, e deposito di contaminacion di petroleo, cu ta menasa e region directo di Aruba na momento cu mundo ta bati alarma pa loke naturalesa por produci.
Na momento cu a cuminsa papia di cambio di clima, hopi hende a hari. Awe dolor di Pueblonan rond mundo y paisnan cu ta mira nan bienestar destrui, ta mustra dede riba negligencia di peligronan manera e situacion cu Nicolas Maduro ta crea dilanti beachnan di Aruba cu mester tene cuenta tambe cu loke e cambio di clima por produci!
